E revista Mericano Forbes, specialisa na finansa y negoshi, a adverti den un di articulo di su ultimo edicion di Mexico, cu ‘Argentina ta na un paso di collapse economico (di nobo)’.
Cu e titulo ey, e medio Mericano influyente, cu pa cada aña ta formula e lista di e personanan mas miyonario na mundo, a sostene cu e situacion economico di e pais Suramericano ‘lo sigui cu vulnerabilidad’, a pesar di e ‘rescate di 50.000 miyon di dollar di FMI’, debi na, entre otro rason, e ‘fuga di capital’ y e ‘nivel di debe’.
Na su bes, Forbes a duna enfoke na e 3.198 compania cu a cera entre 2015 y 2017, shete pa dia, di acuerdo cu dato di Administracion Federal di Ingreso Publico (AFIP), of multinacional manera ‘Coca Cola, Cerrefour, of Avianca’, cu a pidi e estado pa un ‘Procedemiento preventivo di crisis’ (PPC), dispositivo legal mediante cual e firma ta comunica e Ministerio di Trabou y Produccion cu, como minimo, lo drenta un proceso di ‘achicamento’, cu eventual retiro.
Como un dato positivo, Forbes a destaca cu e gobierno di Mauricio Macri a logra aña pasa supera e meta fiscal acorda pa e Fondo Monetario Internacional (FMI), ora el a alcansa un deficit fiscal di 2,4% na 2018, en bes di 2,7%.
E economista Argentino, Emmanuel Agis, a bisa cu no ta di acuerdo cu e analisis di e revist,a teniendo na cuenta e titulo di e articulo, specialmente e ‘di nobo’ ey, cu ta haci referencia e crisis di 2001. Y ta aclara: “Esaki ta un crisis hopi distinto, no pa motibo cu ta menos grave of pa via cu e Argentinonan ta pasa miho, sino cu fundamentalmente e biaha aki no ta golpia e banconan.”
