Gobierno di Peru lo cancela visa di e representantenan diplomatico Venezolano na Lima, kendenan lo por converti den “ilegal” desde dia 9 di maart, asina vice-canciyer Peruano Hugo de Zela a bisa na un radio local.
E diplomatico Peruano a afirma cu Peru a reconoce e embahador designa pa e lider Venezolano di oposicion, Juan Guaido, y cu no lo reconoce e funcionarionan di e embahada, nombra pa presidente Venezolano, Nicolas Maduro.
“A comunica na e miembronan di embahada di Venezuela cu den un plazo duna na nan, no lo reconoce nan como representante di Venezuela,” e vice-canciyer Peruano a bisa na e radio local.
“Nos ta espera cu lo cumpli cu e plazo y na e momento ey nos lo bisa nan cu nan lo ta ciudadano, dispensa, ilegal na Peru, pasobra lo bay cancela nan visa. E plazo cu lo duna nan ta di 15 dia, desde diabierna pasa,” el a afirma.
Cu e decision aki gobierno di presidente Martin Vizcarra ta endurece su posicion contra posicion di Maduro, cu ta enfrenta presion creciente di parti di comunidad internacional pa bandona poder.
