Robert Leal: ‘Stress por crea e raiz di circulo vicioso’

ORANJESTAD – Stress ta un sentimento di tension fisico of emocional. E ta e reaccion di e curpa. Psycholoog Robert Leal a papia cu Bon Dia Aruba tocante e stress, y con e por ta e raiz di circulo vicioso.

Leal ta bisa pa parti stress den dos area. E prome ta e tension mental y corporal cu ta bin por ehempel di exceso di trabou, e trahamento di aki, aya locual e curpa ta sufri. E ta remarca tambe cu tin persona ta bay gym constante pa baha stress, pero ‘locual nan no sa ta cu e exceso por duna stress’.

Sinembargo, Leal ta bisa cu cualkier cos na exceso por duna stress. Sea den cualkier cos cu un persona haci. “Stress tambe por bin ora un persona ta busca algo pa alivia e stress, esey ta ocasiona stress.”

Ora cu un persona ta bou di tension, cu e no por hala rosea bon, anto pa motibo aki e ta cuminsa huma. Leal ta bisa e funcion di e humamento ta activa e ‘bronchious pulmonar’, asina e persona ta sinti e por hala rosea.

Den e caso aki, e persona ta drenta den un circulo di vicioso. Pa motibo cu e la opta pa huma y por hala rosea, tin menos espacio pa wordo yena cu oxigeno pa ser activa, anto menos espacio ta pone cu e persona ‘mester huma mas’ te na momento cu e no por los mas.

Leal ta agrega cu den experiencia di su practica manera psicologo, e por yuda un persona ‘mas lihe’ ora e ta consumi cocaina tur dia, cu un persona cu ta huma y bebe alcohol tur dia. “E no ta bay pa e gravedad di e substancia pero e ta bay mas pa locual e ta haci cu bo na un nivel emocional.”

E tension cu tin pa motibo di e stress, ta mara na nervio di persona, ‘principalmente miedo’. “Esey ta locual nos ta wak na e cuminsamento di huma, bebe di mas y tur otro cu por ocasiona un vicio.”

Un conseho cu Leal ta bisa pa persona cu tin stress ta pa busca un hobby asina entretene, tecnica di hala rosea, un actividad fisico. Leal ta bisa, e vicio no ta producto di problema mental. Tin hende cu tin problema mental cu ta alcoholico. “Mayoria di hende cu problema mental no ta alcoholico. No necesariamente nan ta pega na otro, pero tin ora cu si.”

Segun Leal, hopi hende ta busca pa sali for di e situacion cu di stress di nan circulo vicioso. Problema familiar ta ocasiona cu un persona ta cay den e circulo vicioso. Culpa un persona den famia pa situacion, falta di placa, no por paga debe, presion cu cosnan ta bira caro y ta crea conflicto entre pareha.

E ta bisa un di rason ta e problema economico. “Tin persona cu ta stima nan pareha ora e situacion economico ta bon, pero manera drenta den problema cu placa ta mustra tiki, e ora ta lag’e. Si no tin placa, no tin stimacion.”

No mester mescla e parti di amor cu e stress. Segun Leal, e concepto di stimacion, e proceso di tolerancia, respet, consideracion cu un ser humano tin pa su pareha, tampoco por bruha cu pasion. “Pasion ta un grado di excitacion sexual cu hende tin pa otro. Por gusta un persona, pero no stim’e. E momento cu falta placa, no mester tin problema sino laga e amor profundisa.”

Sinembargo, Leal ta bisa no por compara persona cu tin hopi cantidad cu esunnan cu tin tiki cantidad di placa. “Tin hende ta kere paso cierto hende ta rico nan no tin problema, mi a yega di topa persona cu hopi placa cu tin conflicto cu nan pareha. E problema ta keda mescos. Claro un clase medio mester lucha, esey por ta un aspecto.”

Leal ta splica cu tin algun hende cu ta crece, pero e mentalidad no ta suficiente madura. E persona por tin su diploma, bon trabou, e ta casa, e tin metanan cu el a logra, pero den tur e stabilidad semper e persona ta sinti e falta algo pa ta feliz, ‘e ta sinti incompleto’.

Por ta cu e situacion ta crea tension pa motibo di madurez emocional. Leal ta bisa cu na diferente momento ta pone den practica. “Comunicacion mester ta esencial. Sin esey ta consecuencia inevitabel di pasenshi y respet.”

Den algun situacion, Leal ta bisa cu e problema no ta stress, pero e madurez. E ta continua bisa cu na momento ambos den e relacion por mustra un madurez completo, pero manera stress yega, ‘nan no por maneha e situacion’. E maneho optimal di e situacion ey kiermen madurez.

“E por ta wordo bendi manera stress, pero si nan gara e sintoma, e ta mustra e falta di madurez. Si un persona no tin tolerancia na otro persona, sea famia, colega of cualkier otro persona, e ta drenta den stress”, Leal ta splica.

Cada persona ta dicidi con pa mantene e control. Pa den cada situacion cu un adulto por cay den dje, e genera tension por tin consideracion cu nan pareha y actua di un forma madura. “Comunicacion cu bo pareha mester ta cla, esey ta e tecnica cu tin pa e consenshi.”