ORANJESTAD – Na luna di juli di aña 2017, un antisocial a comete acto di vandalismo riba e escultura ‘Dama di Husticia’ cu ta ubica dilanti di e Corte di Husticia di Aruba.
Bon Dia Aruba a tuma contacto cu Ciro Abath, kende ta e artista escultor creado di e ‘Dama di Husticia’, y el a duna di conoce cu despues di basta tempo, el a haya e fondonan corespondi di banda di gobierno pa e por drecha e escultura.
Abath a comenta cu pronto e escultura lo por wordo drecha. E ta espera cu den e luna venidero, prome cu 18 di maart, e lo por haci tur e trabou corespondiente pa e restructuracion. El a splica cu e ta wardando un colega di dje cu ta bin di Hulanda, pa nan por haci e trabou.
Abath a bisa cu e restauracion ta trata di pone e balansa bek cu ta drecha caba, pone un bendahe nobo cu a ser drecha pa e luz por funciona atrobe, pa motibo cu e lo kier pone tur cos nobo di biaha, manera el a expresa. “Tur cos ta bay ok, pero solamente cu e caminda a bay hopi largo, el a tuma un proceso basta largo.”
El a comenta cu awo e ta den e proceso pa fabrica e bendahe di nobo y monta nan den dje den e prome mita di maart, posiblemente.
Bon Dia Aruba a puntra si e comunidad di Aruba lo por haya pa su dia di bandera, 18 di maart, e restructuracion di su ‘Dama di Husticia’, y Abath a contesta: “Mi ta kere cu no lo por alcansa esey, mirando cu e mester haci diferente afspraak cu varios hende, pa den transcurso di un siman tur cos lo por wordo haci”.
