WILLEMSTAD – Ex minister di Husticia, Nelson Navarro, nunca no a compronde ta con bini e homber Erik K., kende tabata hefe di RST te cu dianan cu Wiels a fayece, a bira su consehero despues. Esaki ta locual e ex minister a duna di conoce aña pasa.
Segun Nelson Navarro e no sa tampoco ta ken a tuma e decision pa laga ex hefe di RST, Erik K. bira su consehero. E decision di haci Erik K. consehero di Nelson Navarro, segun un otro ex minister di husticia, Kade Wilsoe, tabata uno di Helmin Wiels, kende a papia cu K. riba su posicion nobo despues di baha cu team chef na RST. “Mi a taha Helmin di papia cu RST, como ex minister di husticia mi sa con nan ta traha”, Wilsoe a bisa durante un documentario riba asesinato di Helmin Wiels. Segun Wilsoe, Helmin Wiels a confirma e motibo dicon Erik K. tabata papia cu ne. Wiels a bisa Wilsoe, cu Erik K. tabata ke un posicion como consehero di minister. E temporada ey, Pueblo Soberano no tabatin e cartera di husticia mas.
Dicon Wiels lo a percura pa Erik K. bira consehero mientras e tabata boga pa elimina influencia Hulandes? E rumornan cu Wiels tabata papia cu RST y Erik K. , a bin cay den grupo criminal di atracado nan di oloshi. E informacion tabata bisa cu Wiels ta trahando un deal cu RST pa cera Jorge Jamaloodin pa compra di oloshi horta. P’esey pa tal motibo, nunca no por separa e morto di Wiels for di oloshi nan horta. Segun Gert Rip, e planeamento riba morto di Wiels a start riba 2 di juni 2012, despues cu defunto Pretu Florentina, kende a plania e morto di Wiels, a bay cas di Jorge Jamaloodin cu Nini Fonseca. Esaki a sosode riba e anochi specifico, despues cu e grupo a horta oloshi na mall di Renaissance.
