ORANJESTAD – Diasabra aki, dia 23 di februari e Venezolanonan ta bolbe pa e Plasa Bolivar di Oranjestad desde 10or di mainta te 12or di merdia, cu e obhetivo di apoya e ayudo humanitario procedente di varios pais, entre nan Merca.
Cu nan apoyo nan a demostra e solidaridad cu e pueblo di Venezuela, cu tanto mester di ayudo, aunke e mandatario Venezolano Nicolas Maduro ta nenga pa laga drenta tur e insumo y material cu e ayudo humanitario ta contene.
Siguiendo e linemento di e presidente di Asamblea Nacional di Venezuela y presidente (encarga) di e republica, e Venezolanonan lo lanta nan bos na mas di shen pais pa apoya e causa aki. Aruba lo ta parti pa e recoleccion di insumo y medicina cu despues lo wordo manda pa Corsou, unda ta existi un centro di acopio.
Bon Dia Aruba a contacta sra. Laura Luces, kende a splica cu na Venezuela, tres mil persona a muri entre 2017-2018 pa motibo di no a ricibi dialisis. Na 2018, Venezuela tabatin 9,362 caso di difteria y sarampion, resultando den 230 morto. Den 2017 so, tabatin 400,000 caso di malaria, 140,000 pashent di cancer y mas di 300,000 cu problema di curason cu no ta haya tratamento medico. Cinco mil pashent di AIDS a fayece, mas di 300,000 pashent cu malesa cronico no ta haya nan medicamento.
Di su parti, Delia Roldan a sigura cu tur e cifranan aki ta bay hunto cu un crisis devastador di desnutricion, tanto cerca mucha como adulto. Sueldo minimo no ta yega ni pa un caha di aspirina, y escasez na boticanan ta como 85% di medicamento na 88% di e hospitalnan, y 55% di e mediconan a bandona e pais.
Cu tur e factornan esaki, Andreina Rubio ta invita henter comunidad di Aruba pa compaña e actividad aki, unda lo ricibi cualkier tipo di donacion cu despues lo wordo manda pa e centro di acopio na Corsou, y for di eynan lo bay Venezuela. Cualkier donacion ta wordo acepta, lo importante ta pa colabora.
