ORANJESTAD – Ayera durante un conferencia di prensa di Departamento di Obra Publico (DOW), Joao Suares general manager di e proyecto aki, a duna un update tocante e avancenan di e ‘ringweg’ mas conoci como Watty Vos Boulevard.
El a comenta cu e rotonde di Sero Patrishi ta esun mas grandi di e proyecto y ta e unico cu lo tin un diseño cu cinco entrada, pero tin un cantidad significativo di trabou pa e servicio publico, debi na e diferente nivelnan di e camindanan cu mester conecta eynan.
Tambe a informa cu DOW a haci un bon trabou comprometi cu e companianan Web, Setar, Elmar, y na e momentonan aki nan tin planea pa termina e rotonde aki pa mita di april na e rotonde aki cu ta esun mas compleho.
Pa loke ta e rotonde na Ling & Sons, ayera cuminsa cu e trabou di asfalta, di manera rapido pa por yega na reapertura den prome fin di siman di maart. Na Meiveld segun planificacion na luna di juni e paso lo mester ta habri atrobe, cu e trabou completamente ehecuta.
Suares a referi na e situacion na Hato, cu tur e problemanan di trafico cu tur hende ta experimenta tur dia. Ta trahando di tal manera pa causa lo menos problema posibel y ta studia un solucion pa e ciere di e caminda, cu no conoce tanto alternativa.
Pa loke ta trata J.E. Irausquin Boulevard, ta discuti entre DOW y Cuerpo Policial pa reduci e impacto pa e usuarionan di e caminda aki. Manera conoci , actualmente ta existi un problema cu luz di trafico na Palm Beach, pero esey no tin solucion ainda.
Pa loke ta e proyecto di e caminda di hotel Amsterdam Manor te Divi Phoenix, e compania lo traha espacio na banda pa auto por pasa banda di lama. Lo no cera e caminda aki, cu excepcion di diasabra, pa por permiti e paso via Palm Beach, cu lo bay cuminsa implementa riba e diasabra aki. Tambe tin e trabou cu lo cuminsa haci na fin di luna di maart banda di hotel Costa Linda, cu ta trata di un parking lot.
Sra Swinda Dijkhoff, project manager di Watty Vos Boulevard di DOW, a comenta pa Bon Dia Aruba e problematica di awa cu e rotonde di Cumana tabatin. Aña pasa a realisa un trabou cu e ceramento di e rotonde dos biaha, pa asina e compania encarga por a coba un tubo grandi pa pasa bao di e caminda, pa e tubo hiba awa den direccion panort hunto cu e boulevard, pa asina den futuro no tin mas problema cu awa para na e rotonde.
