ORANJESTAD – Ayera a tuma e reunion publico tocante desaroyo reciente relaciona cu supervision financiero (CAft) den sala di parlamento. Un debate cu a surgi despues di e impasse cu a surgi entre gobierno y CAft riba exigencia di e organo di supervision financiero aki pa haya mas documentacion cu por sustenta e presupuesto 2019.

Minister di finansa, Xiomara Ruiz-Maduro a declara na Bon Dia Aruba cu nan no a trata e ley di LAft (landsverordening Aruba financieel toezicht), pero si el a haya un apelacion di parlamento pa bin cla cune, pa asina e cambio di ley por wordo trata pronto. Pero si tabatin preguntanan, entre otro, ki cambionan e ley aki ta bay tin. Ya cu tin un protocol entre gobierno di Hulanda y esun di Aruba, y esaki ta haci cu e normanan mester wordo cambia den e ley di LAft. El a bisa cu semper parlamento ta keda e organo democratico cu tin autoridad pa haci otro cambionan.

Na final di e reunion tabatin dos mocion presenta y sosteni pa e fraccion di coalicion di gobierno (MEP-POR-RED). Un mocion tin di haber cu CAft como organo, caminda retiro di un miembro di dje, Sr. Kamp, kende tabata un ex politico y ex minister, a wordo pidi. El a splica cu e tempo cu e ley di LAft a pasa den parlamento, a wordo treci un amienda cu den e organo no por tin un politico den dje.

E di dos mocion tabata pa duna peso atrobe na un mocion cu a yega di pasa den parlamento, den cual tabata urgi pa e ley di LAft bin mas pronto cu ta posibel na parlamento.

Interesante di e debate aki tabata e posicion di e unico fraccion di oposicion rond di e asunto di e rol di CAft na Aruba. Un instancia cu a keda introduci pa Hulanda durante e protocol firma cu gobierno anterior di gabinete Mike Eman II na 2014. Ruiz-Maduro ta kere cu su posicion consiliado tabata debi cu nan ‘consenshi tambe ta remorde.’

E ta haya cu e realidad ta cu awe nos tin un discusion ariba supervision, pasobra no a dedica atencion necesario na e parti financiero. Decision cu a perhudica nos pais, caminda gobierno anterior a redobla e debe nacional den 4 aña di tempo. Esaki a trece su consecuencia cune y un di nan ta e parti di supervision financiero.

Oposicion
Durante e prome ronda di pregunta e posicion di dos miembro di e fraccion di AVP, Mike de Meza y Richard Arends tabata uno di consideracion y no di cuestionamento. Principalmente di e dos parlamentario aki, cu a hunga un rol importante den e proceso di instalacion di CAft na Aruba, uno como ex minister di Finansa y e otro como su consehero principal.

Mas tanto nan deseo tabata pa sa con gobierno su plan pa incorpora e protocol of acuerdo cu nan a firma cu Hulanda den e LAft ta. Y si e no ta bay forma parti di e ley di LAFt henteramente, ken lo haci supervision ariba e otro componentenan di e ley aki. Tambe pa urgi gobierno pa presenta e concepto di ley di cambio di LAft mas pronto posibel.

Ambos parlamentario, apart di cualkier signatura politico, a indica cu ta prerogativo di cada gobierno pa dicidi con e fondonan ta wordo aloca. Nan a fungi manera conseheronan durante e crisis cu a surgi cu CAft a base di e trabou di supervision cu nan ta realisa.

Parlamentario de Meza ta kere cu mester yega un momento di para hunto y crece ariba e nivel di necesario pa trece un posicion dilanti Hulanda pa respeta e reglanan y evita e tipo di ‘intervension’ cu tin actualmente, ya cu esaki ta afecta tur gobierno. Sin pretende di hunga politica, e ta haya cu e ley di LAft, mester wordo evalua, ya cu e tin cu sali.

E ta indica cu e kier wak con leu e fraccion cu ta sostene gobierno ta laga cu e tipo di ley aki ta wordo impone riba gobierno. E ta kere cu conhuntamente nan mester pone un paro na e situacion aki, y bisa Hulanda no sigui pusha algo asina, ya cu e ta hasta contra di nos constitucion. E ta spera cu hunto nan por sali for di e tipo di trato aki, y mustra Hulanda cu Aruba ta partner den reino, caminda nos ta exigi trato igual di respet den esaki.

Segun parlamentario Arends, e hecho ta cu tin protocol of/y documento, pero ora cu nan ta puntra si LAft, cu ta e base legal di CAft, ta cubri e tarea cu esaki tin. Kiermen si e unico tarea cu ta e normanan di articulo 14, ken ta haci supervision riba e resto di protocol. Pues si e protocol no ta hinca den e ley, sino un porcentahe chikito, e ta puntra su mes pakico of ken ta haci e supervision a base di e resto di e protocol.

Pues cual ta e base legal di e supervision intenso aki. E ta kere cu nan no por tin diferencia di opinion, esta cu e conseho di minister di Reino no por basa su accion a base di un protocol cu a wordo firma cu gobierno. Mientras cu ta wordo crea un situacion caminda parlamento ta aproba un ley di presupuesto cu ta cumpli cu normanan. Gobernador ta firm’e y e ley ta wordo publica y e ta haya su validez. Otro banda, gobierno ta haya un recomendacion y ta manda un cambio pa e presupuesto cu a wordo aproba, y e motivacion pa haci esey ta basa riba protocol.

E ta considera cu e protocol aki, nan como parlamento no tin control riba dje, ya cu e no ta forma parti di e ley mes. E ta haya cu esaki ta pone parlamento como un instituto democratico den un situacion penoso, pero tambe Gobernador como instituto. Dilanti e situacion aki, Arends ta haya cu nos tin tres opcion nos dilanti: Un ta bin cu un cambio den LAft, manera e protocol ta prescribi. E resto di e protocol ta wordo poni un banda locual e ta considera constitucionalmente corecto. Otro opcion tin di haber di incorpora e protocol full den e ley locual huridicamente lo ta corecto. Y e di tres opcion lo ta cambia e LAft -segun e protocol- mientras cu e protocol ta wordo ‘nageleefd’ dor di gobierno, CAft, conseho di minister di Reino.

E no ta kere cu ta constitucionalmente corecto. Of simplemente laga tur cos mescos y conseho di minister di reino ta haci loke nan kier, ya cu na 2014 nan a duna un ‘aanwijzing’ sin protocol, y sin ley, y sin afspraak. E ta haya cu esaki ta e situacion cu pais Aruba ta actualmente. E ta mas cu un protocol riba finansa publico, pero e tin di haber cu acercamento pa loke ta trata relacion den reino. E no kier perde oportunidad pa bisa pakico un ‘verschilregeling’ ta asina importante pa Reino y tur constelacion cu ta forma parti di dje.