A3 proyecto gezonde scholen michelle winklaar (NP).jpg
Michelle Hooyboer Winklaar

Ta drentando den e ultimo aña di e Proyecto piloto di Scolnan Saludabel y tabatin reunionnan caba andando  di parti di e comision cu a draai e Proyecto piloto por completo, pero tambe a reuni cu Parlamento pa wak con lo sigui expande e Proyecto pa tur scol bay den mesun direccion segun minister encarga cu enseñansa Michelle Hooyboer – Winklaar.

 

“Ta wardando e recomendacionnan di e comision pa mira con lo por implementa esaki na tur e diferente scolnan na Aruba. Tin un reunion otro siman cu e comision unda cu nan lo presenta diferente opcion na nos. Ami como minister encarga cu enseñansa, minister di salubridad publico Alex Schwengle y minister di hubentud Paul Croes,” 

 

Mon Plaisir, Kudawecha y Conrado Coronel ta algun di e scolnan cu a participa na e Proyecto piloto di Scolnan Saludabel, en total ta 8 scol cu a participa. Tambe e scolnan a participa den e ramo di salud den diferente area y no ta tur a haci mescos. Cada scol a scoge riba kico nan ta bay traha, por ehempel nutricion y otro movecion. For di tur e 8 diferente areanan cu por a scoge pa traha riba dje, segun Sr. Hooyboer – Winklaar, ta te ora cu un scol ta cumpli cu tur e areanan aki, e por wordo yama un “gezonde school” ( scol saludabel) completo. Den e caso aki e scolnan den e fase piloto a pone esfuerso rond di un tema.

 

Banda di esaki, ora cu ta trahando cu e scolnan a puntra Sra. Hooyboer – Winklaar si tin profesional ta papia cu mayornan tambe. Special den caso si mira muchanan cu riesgo pa cierto malesanan a consecuencia di no ta saludabel. Segun Sra. Hooyboer – Winklaar esaki ta e caso. E parti di mayornan ta keda sumamente esencial mirando cu studiantenan ta comparti hopi di nan tempo na scol y tambe na cas, p’esey e triangulo ey ta keda importante. Nos no ta wak solamente e parti academico pero tambe e parti di salud. “Si un mucha ta come bon na scol e ta bon pa mayornan sa kico ta bon pa nan haci na cas. Y esunnan cu ta wordo considera como risico pa motibo di nan peso of otro indicadornan, ta wordo notifica na mayornan.”

 

Scol saludabel

Hopi biaha ora scucha di Scol Saludabel ta pensa cu e scol no ta bende pastechi mas y ta ofrece cumindanan mas saludabel. Sinembargo nutricion ta solamente un aspecto. Scol Saludabel ta traha riba diferente otro aspecto mas manera entre otro e aspecto psicologico, social, emocional, e aspecto di siguridad, di movecion y deporte. E base ta di un concepto di Hulanda, pero adapta cu diferente aspectonan di Latino America, Caribe y Norte America. Cu e programa aki scolnan ta haya tambe guia y sosten di diferente instancia. Na momento cu un studiante of maestro yega scol, e mester sinti su mes safe y saludabel. E pensamento ta cu den un esfera positivo e prestacion academico ta mas miho. E grupo di maneho ta wordo representa pa tres diferente ministerio: Ministerio di Salubridad Publico, Ministerio di Enseñansa y Ministerio di Asuntonan Social. E intencion ta pa mas scol di Aruba participa na e proyecto aki. Despues di evaluacion cu e scolnan piloto lo traha un nota di conseho cu ta duna un analisis di kico tur mester pa por aplica esaki na e otro scolnan na Aruba. E proyecto aki actualmente ta enfoca riba scolnan basico.

 

Cifra obesidad muchanan (CDC)

 

Obesidad cerca muchanan a mas di duplica y a bira mas cu 4 biaha mas hopi cerca adolescente e ultimo 30 añanan. E porcentahe di muchanan entre 6 cu 11 aña na Merca cu tabata sufri di obesidad a aumenta for di 7% na 1980 te na cas 18% na 2012. Similar, e porcentahe di adolescente entre 12 cu 19 aña cu tabata sufri di obesidad a aumenta di 5% te na casi 12% den e mesun periodo. Na 2012, mas cu un tercer parti di muchanan y adolescentenan tabata tin peso di mas of sufri di obesidad. Sobre peso ta wordo defini ora cu tin cantidad di peso excesivo pa un cierto peso, di vet, musculo, weso, awa, of un combinacion di e factornan aki. Obesidad ta wordo defini como e echo cu tin demasiado vet na curpa. Sobre peso y obesidad ta ambos resultado di un desbalansa di caloria. Mucho poco caloria ta wordo kima, compara cu cantidad di caloria cu ta wordo tuma. Esaki ta wordo afecta pa diferente factor manera genetico, comportacion y ambiental. Esakinan segun Centers of Disease Control (CDC).

 

Obesidad cerca mucha tin efecto di biaha y a termino largo pa salud y bienestar

 

Muchanan cu ta sufri di obesidad tin mas chens pa tin factornan di riesgo pa malesa di curason manera presion halto of colesterol halto. Adolescentenan tin mas chens pa ta pre diabetico, un condicion den cual e nivel di glucose den e sanger ta indica riesgo halto pa desaroya diabetes. Muchanan y adolescentenan cu ta sufri di obesidad tin mas riesgo pa sufri di problema cu weso, soño y problemanan psicosocial manera autoestima abou. Efecto pa e salud a termino largo ta entre otro diabetes tipo dos, problema cu curason, strook, diferente cancer etc. Un estudio ta mustra cu muchanan cu ta sufri di obesidad na edad hoben manera 2 aña, tin chens mas grandi di ta adulto cu ta sufri di obesidad.

 

Prevencion

Prevencion ta e manera cu por baha e riesgo pa sufri di e complicacionnan medico aki y ta encera cambio di estilo di bida, cambio di custumber di come y hacimento di actividad fisico. Comemento y nivel di actividad fisico cerca muchanan y adolescente ta influencia pa diferente sector den nos sociedad. Incluyendo famianan, comunidad, scolnan, esunnan cu ta provee cuido medico, agencianan gubernamental, media y industria di cuminda y bebida. Scol ta hunga un rol particularmente grandi y critico den establece un rol sigur como un medio ambiente cu ta sostene e practica pa comportacion saludabel. Scolnan ta provee oportunidad pa studiantenan practica comemento saludabel y hacimento di actividad fisico.