A pesar di tur dificultad pa firma CAO nobo: Trahadonan di aeropuerto no tabatin mester bay den accion

Un biaha mas diaranson atardi gerencia di Aeropuerto (Triple A)  y dirigente di sindicato STA a sinta hunto, pero e biaha aki pa firma e Contracto Colectivo (CAO) nobo di 4 aña. E CAO aki ta producto di un proceso di negociacion pisa, nada facil y cu a pasa den turbulencia entre ambos partido, y cu tabatin mester di intermediacion valioso di Mediador di Gobierno, sr. Anselmo Pontilius.

Ya mas trankil y cu un bos mas concilia ambos partido a vocifera e beneficio di e CAO nobo pa e trahadonan di nos principal terminal aereo. Presidente di STA, sr. Diego de Cuba a bisa cu mirando tur e ingredientenan cu e CAO aki tin aden, e ta bira e “miho CAO” riba Aruba, si e no e miho CAO caba, mirando cu den su trabou como sindicalista e ta conoce hopi CAOnan.

No mester di welga

El a expresa su satisfaccion cu a pesar di tur dificultad nan a yega te na final, sin mester bay den accion. Sr. de Cuba ta haya “bunita” cu nan no mester bay den accion, ya cu nan sa con importante nos terminal aereo ta pa pais Aruba. Tambe e ta kere cu mayoria di empleadonan di Triple A ta stima nan trabou.

E sindicalista a bisa cu pa prome biaha den su historia sindical cu e ta presenta un CAO y cu unanimamente tur empleadonan a vota pro di e concepto cu nan a presenta. Nan ta bay haya un bonus unabes cu e CAO a wordo firma. Lo tin un aumento retroactivo di 100 florin desde januari 2016 y e trahadonan lo conoce un aumento entre 1.5% pa 2% anualmente. Tur empleado di aeropuerto a bay dilanti pa e parti financiero pa e cuater aña cu un “suma substancial”, segun sr. de Cuba.

El a gradici tur hende cu a haci posibel pa yega na e acto culminante aki di e firma di e CAO nobo aki. Specialmente el a gradici sr. Pontilius kende den su rol di Mediador di Gobierno a sa di intermedia pa asina ambos parti envolvi por a yega mas lihe cerca di otro.

Perseverancia

El a bisa cu ta frustrante ora cu nan ta presenta un concepto di CAO y pa casi nuebe luna largo nada tabata wordo defini. E veterano sindicalista de Cuba a expresa cu esaki ta un prueba di e “perseverancia cu sindicato STA tin cu no ta conoce limite”.

Na final el a invita pa tur trahado bay disfruta di e beneficionan cu e CAO aki tin. E ta reconoce cu asina como nan tin nan derechonan, tambe nan tin nan debernan cu nan tin cu cumpli cun’e den e contracto colectivo aki.

“Mi ta spera cu manera nos ta haci’e semper cu conhuntamente nos por sigui hiba Triple A dilanti”, presidente di STA a declara. Sr. de Cuba a yega di bisa na Bon Dia Aruba cu un grupo di 153 trahado ta resulta beneficia cu e CAO nobo aki.