Fundacionnan social trahando cu presupuesto hopi limita

ORANJESTAD – Parlamentario Shailiny Tromp-Lee ta lamenta cu e subsidio pa fundacionnan social no ta keda ahusta di parti di gobierno. Pero di otro banda pa añanan nan ta ripara cu e sponsornan cu habitualmente nan tabata ricibi ayudo for di nan, esaki keto bay a bira menos.

E ta miembro di e comision fiho di asuntonan social, famia y cuido di nos grandinan y salubridad publico recientemente a bishita fundacion Ambiente feliz na Santa Cruz. Nan tin 20 cliente y pa nan, e fundacion aki tin un presupuesto di solamente 2500 florin pa luna pa percura cu nan por haya un dieta balansa y saludabel, pero e suma ey no ta suficiente.

E parlamentario a indica cu e tipo di fundacion social aki cu ta traha cu nos grandinan su fondo ta minimo, nan recurso humano ta limita y nan infrastructura ta deficiente, pero nan ta realisa un trabou di curason. Alomenos e grupo mas vulnerabel den nos comunidad por haya e cuido necesario. Ta keda si pa gobierno garantisa cu e cuido ta uno debido y di nivel.

E meta tabata pa e miembronan di e comision por mira cu nan propio wowonan e reto cu diariamente nan tin cu atende durante nan trabou. Pero tambe pa papia riba posibel solucion y manera con parlamento lo por yuda pa crea solucionnan duradero pa nan como fundacion cu ta atende cu nos grandinan.

Un di nan tin di haber cu anualmente nan ta presenta na gobierno un presupuesto, pero esaki pa añanan caba no ta keda honra. Of nan ta keda cu e mesun suma cu semper a haya den pasado of te hasta tin añanan cu e suma asigna a bira menos. Esaki ta pone cu nan ta opera den situacion dificil.

“Pero loke ta mas preocupante ta cu e cuido no ta di e calidad necesario”, el a expresa.

Tur dia nan tin cu kita y pone, kiermen haci maniobranan financiero pa percura cu nan clientenan por haya e cuido debido. Pero tambe nan tin otro reto no financiero cu ta e parti di siguridad. Nan tin problema cu e infrastructura di e edificio por ehempel cu e dak cu ta lek. Te hasta e awa ta pasa door di e parti electrico cu por crea un situacion peligroso. Otro reto ta e ampliacion di nan cushina y hisa e nivel di siguridad pa nan clientenan.

E ta kere cu esaki ta un indicacion pa kico e crisis plan social tabata necesario pasobra cada bes mas fundacion ta acerca comercio pa por yena e buraco financiero.