Presidente encarga Juan Guaido a pone ayera e meta di yega na un miyon boluntario cu mester enfrenta e blokeo di e regimen di Nicolas Maduro na entrada diasabra venidero di e ayudo humanitario recolecta na Colombia, Brasil y Curaçao, e mayoria manda pa Merca. Den un mensahe e lider opositor a laga sa cu ya a registra mas di 600.000 boluntario.
Riba solicitud di Guaido, reconoci como mandatario interino pa 50 pais, gruponan di boluntario a cuminsa traha diadomingo na varios estado di e pais den reunion di preparacion y den e asina yama campamentonan humanitario.
Guaido asigura cu e pais “ta prepara pa e avalancha humanitario,” aunke cu e no kier a revela detaye tocante con lo vence e cerco imponi pa Maduro.
“Nos ta bay ta anuncia cosnan specifico, poco poco. Hugada gana no ta canta,” el a bisa.
Maduro a ordena e militarnan pa blokia e entrada na e pais di e ayudo di medicina y alimento, considerando esaki un “show politico” y e inicio di un invasion militar Mericano.
E situacion ta hopi sensitivo na un pais cu ta biba den un debacle economico cu escasez di medicina y alimento, unda e hiperinflacion ta haci cumpra alimento imposibel.
Guaido a scoge pa e entrada di e ayudo dia 23 di februari, ora e cumpli un luna di huramenta como presidente encarga, despues cu parlamento Venezolano a declara Maduro usurpador di presidencia despues di eleccion fraudulento.
Tres avion militar di Merca a yega diasabra pasa na Cucuta, unda ta almacena ayudo desde dia 7 di februari.
E senador Republicano di Merca, Marco Rubio, a yega ayera na Colombia pa reuni cu funcionarionan cu ta trahando den e centro di recoleccion na Cucuta, asina el a confirma riba su cuenta di Twitter.
Den e conferencia di Siguridad di Munchen e vice-presidente Mericano Mike Pence a urgi diasabra Union Europeo pa reconoce Guaido conhuntamente. Varios pais Europeo a haci esey caba, pero e otronan ta blokiando un posicion conhunto di e union.
