Un factor cu ta un posibilidad clave pa nos turismo, tin di haber cu e situacion di otro mercadonan clave pa Europa.
Directora di Aruba Tourism Authority (ATA), sra. Ronella Tjin Asjoe-Croes a destaca na Bon Dia Aruba cu e echo pa ehempel Turkia cu tin su reto interno riba aspecto di siguridad, tambe Egipto, lo por bira un oportunidad pa Aruba su mercado lo por crece na Europa.
“Tur esaki ta mercadonan clave cu hopi biaha ta esunnan cu ta wordo scogi y promovi masha pisa mes den e mercado di Europa”, segun directora di ATA.
Igualmente el a menciona e compania aereo KLM cu conhuntamente cu ATA a wordo pusha pa den un periodo basta corto nan a anuncia un incrementacion di nan vuelonan. E ta cu adicion di un frecuencia den e lunanan actual di zomer.
Nan ta decision cu ta tuma su tempo pero sinembargo condicion di e mercado y cierto retonan cu e continente Europeo ta pasando aden ta brinda oportunidadnan pa Aruba. “Y esey nos ta capitalisa di dje tambe”, sra. Tjin Asjoe-Croes a bisa.
Cuba y Aruba
El a trece dilanti cu parti di e negociacion y aliansa cu Cuba riba materia turistico consagra cu e MoU cu a keda firma cu e isla aki, ta e combinacion di Cuba-Aruba. E ta un pakete cu ta zona bon y cu ta mustra atractivo kisas pa e mercado Europeo.
Directora di ATA a splica cu Cuba ya caba ta atrae e mercado Europeo y nan ta estableci den e continente ey, pero e combinacion di e dos productonan aki ta un ingrediente atractivo considerando cu e turista Europeo ta biaha pa un periodo mas largo.
