Despues di varios siman di silencio, porfin Marisol Lopez Tromp, miembro di fraccion di partido den gobierno y tambe presidente di Parlamento, a caba cu speculacion kico lo tabata consecuencia di e violencia entre su persona y e vice presidente. Segun su opinion, e muestra cla di banda di su coleganan di partido cu nan no ta bay atende e asunto na un manera debido, y mucho menos scoge su banda den e conflicto aki, no a laga otro opcion cu bandona e partido berde.
E ruptura aki a bira inevitabel pasobra no por a spera otro di e persona aki, den e circunstancianan cu a surgi. A pesar cu te awe no tin un claridad kico a sucede exactamente e dia ey, ta bisto y logico cu un persona femenino a ser agredi pa un persona masculino. Ambos a haci denuncia oficial bisando basicamente cu e otro ta gaña, y manera nos a siña conoce nos autoridadnan hudicial, nada lo sali for di e investigacion, si acaso tin un investigacion andando ainda. E ta haci nos corda un caso di varios aña pasa; e caso di e ministro femenino cu a haya e apodo di ‘postema’ cu a ser agredi pa esposa di un polis, pero ‘a la hora de las horas’ autoridadnan hudicial no por a haya adres di e famia… y a seponeer e caso. Ban wak ta ki excuus infantil nos ta haya di tende un di e dianan aki, si acaso nos tende algo.
Pero, e asunto mes: como hende muhe agredi e persona aki no a keda otro opcion cu bandona fila di e partido den gobierno, pasobra keda den e partido aki mas largo, cu no ta dispuesto di atende e asunto, y cu esey tumando parti pa e ‘berdadero AVPista’ den e caso aki, na luga di scoge banda di e miembro nobo cu a bin di otro partido despues di un conflicto. Y el a responde manera hopi a anticipa cu e lo bay haci, y esey ta mantene en todo caso su dignidad como hende muhe cu e no ta sigui traha cu e persona masculino ey, pa mas cu partido desea pa e haci esey. Tur esaki ta tira un luz di duda riba su coleganan femenino di e fraccion, cu no ta parce di e estatura moral pa duna nan opinion den e conflicto aki y acepta eventual consecuencia di esaki. Nos ta anticipa cu nan tur lo acata disciplina di partido y lo scoge pa keda keto y resa pa e nubia scur aki por bay pronto.
Pero, e kiebra aki no ta e unico ruptura cu a cuminsa mustra den e defensa di e partido, cu no mucho tempo pasa tabata parce di titanio. Aña a habri cu kibramento di stoel den Oficina di Gobernacion y un bishita na Gobernador pa pone condicion na su permanencia como ministro. E mesun presidente di Parlamento a vota contra presupuesto di su gobierno y a vota pro mocion di desconfiansa contra ministro encarga cu Infrastructura. E partido cu prome tabata mustra manera un avion supersonico di ultimo modelo, a cuminsa parce mas y mas riba un avion di tempo di hermanos Wright, cu hopi buraco y scheur den e lona di su fuselage. Y e motor tampoco a logra cambia di fuel oil pa gas…
Ironicamente, net na e momento di celebracion di e proyecto cu por significa e diferencia den aña di eleccion, e reapertura di refineria, ta parce cu e ausencia continuo di e lider maximo ta duna espacio pa e contradiccionnan interno cuminsa sali afo. No por bisa den e caso aki cu ta accion bon pensa y bon ehecuta di oposicion ta haciendo un diferencia, sino cu puramente no ta sinti cu tin un liderazgo presente capaz pa mantene union interno.
Pregunta grandi ta kico lo ta e futuro politico pa e presidente di parlamento. Ta tende rumor insistente cu tin un partido na caminda cu ta origina den hendenan di AVP cu ta malcontento, cu tin statuut cla caba, inclusivo financiado grandi. Nos no ta bay specula si ta bay tin algo asina y si di berdad e lo ta un movemento politico viable cu por representa algo diferente. Por lo pronto nos lo simplemente limita nos mes na observa y comenta e accionnan di e fraccion nobo aki pa su meritonan riba su mes. E partido di gobierno no ta mustra asina debilita cu 12 asiento ainda, pero ta bira urgente pa cuminsa pone ordo internamente.
Diripiente, e caminda pa eleccion 2017 cu tabata mustra briyante despues di e hazaña na Venezuela, mas e aceptacion di e guia di CAFT pa e asuntonan financiero cu ta priminti di logra yega mas cerca di un presupuesto balansa, a cuminsa mustra scur atrobe. Y, un biaha mas, esaki no ta presion di pafo, esaki ta e famoso ‘pressure cooker’ cu ta rementa di paden. Diripiente tambe, campaña di eleccion ta den full swing, prome cu nos a yega na e recta final.
