Relacionista publico di Servicio di Impuesto Aruba (SIAD), Meverly Romano ta informa Bon Dia cu dia 30 di juni ta ultimo dia pa paga di tres kwartaal di number di auto cual ta cuminsa dia prome di juli y segun sra. Romano, ley ta bisa cu semper ora di subi caminda bo mester tin bo impuesto paga adelanta.
A yega mita di aña 2016 y segun sra. Romano , SIAD lo verifica pronto e cifra nan di pago pa locual ta number di auto. Pa esunnan cu kisas ainda no tabata sa kico pa haci cu e plachi di number nan di 2015, a keda stipula segun sra. Romano cu mag di keda uza e plachi nan di 2015 pa e resto di aña 2016. Sinembargo pa locual ta aña 2017 no tin decision ainda na kico lo ta e siguiente paso cual segun sra. Roman esey ta un decision cu mas bien gobierno tambe tin cu tuma.
” E intencion ta cu na dado momento e plachi nan aki ta bay por wordo cambia pa plachi nan mas duradero cu por bay mas cu 1 aña, pues e idea ta pa cierto momento bay over na plachi nan cu por dura por ehempel 5 aña. Pues e tipo of calidad di e plachi mester cambia y di tal forma manera nos ta custumbra di cambia di plachi tur aña, den futuro esey no ta bay ta e caso mas” sra. Romano ta bisa.
sra. Romano ta splica tocante e sticker e no por bisa ainda si esaki ta bay keda valido .”Tur esey ta detaye nan cu ainda no ta concreto, pero e intencion ta generalmente pa nos tin plachi nobo.”
sra. Romano ta agrega cu SIAD ta duna cliente nan instruccion na momento cu nan bay paga nan sticker. ”Nos ta duna nan un papel cu instruccion caminda ta para na unda nan mester pega e sticker actual. Den e decreto ministerial tambe cu ta wordo uza hunto cu e ley, ta stipula unda exactamente mester pega esaki cual ta e banda drechi ariba e sticker di e keurmento y banda paden di e windshield, si nan pega esaki otro banda of memey, esey ta e risico cu nan ta core si y si acaso polis para nan mi no sa si nan ta haya un boet pa esaki pero e control eynan no ta den nos man. Nos ta instrui e cliente nan den acuerdo cu e decreto unda nan mester plak e.” sra. Romano a bisa.
