No solamente comunidad internacional ta rechasa Nicolas Maduro como presidente di Venezuela. E propio Venezolanonan, cu desde un siman y mey ta mobilisando den henter e pais, ta exigi e salida di e dictador.
Esaki tambe a keda refleha den e reciente encuesta realisa pa e firma Heron Consultores. Den e encuesta 81,9% di e encuestadonan a reconoce Juan Guaido como presidente interino di Venezuela. Apenas 13,4% a expresa apoyo na e dictador Chavista.
Den e linea ey, 77,6% di esunnan entrevista a sigura cu den eventual eleccion general nan lo vota pa e candidatonan di oposicion. 12,1% so lo haci esaki pa Maduro.
Un abrumador mayoria di e Venezolanonan tambe a aproba e accionnan di Asamblea Nacional y a expresa nan mes na fabor di e realisacion di eleccion presidencial.
Den e contexto aki, 80,2% di e encuestadonan ta contra e Conseho Nacional Electoral (CNE), cu segun nan ta responde na “interesnan politico di Maduro.”
Consulta si nan ta di acuerdo pa Asamblea Nacional, di mayoria opositor, scoge e miembronan nobo di CNE, 65,6% a mustra di ta “muy de acuerdo.”
Di nan parti, 70,4% a aproba e labornan cu e parlamento ta desempeña, e unico organo legitimo reconoci pa gran parti di comunidad internacional.
Secretario general di OEA, Luis Almagro, a comenta riba Twitter e resultadonan di e encuesta. “E Venezolanonan no kier plazo nobo, ni mas ‘dialogo’ cu en realidad ta bla, bla bashi pa gana tempo,” el a bisa. “Nan kier e dictador usurpador afo, nan kier democracia, nan kier vota.”
Guaido y oposicion a convoca mas manifestacion pa awe. “Nos lo sigui riba caya pa respalda e ultimatum cu Union Europeo a duna Maduro )…) Nos ta determina pa sigui padilanti pa garantisa e fin di e usurpacion,” e presidente interino a declara diahuebs pasa.
