Miembro di Cuerpo Policial Aruba, Mayor Alex Pieters ta splica Bon Dia cu e averahe di accidente ta alrededor di 800 pa luna actualmente di locual no ta tur ta grave, sinembargo, e ta mustra cu nos no ta social cu otro den trafico.
”Si bo djis baha bo velocidad un tiki anto tene cuenta cu otro hende por haci fout,
bo por evita accident. Pero si bo keda core duro paso abo tin preferencia sin tene consideracion cu otro, ta asina ki accident ta pasa” sr. Pieters ta bisa.
Esaki segun sr. Pieters ta birando un problema hopi grandi na Aruba anto e ta agrega cu nos trafico ta hopi mas druk cu nunca. ”Aworaki henter dia na playa bo por mira cu trafico ta pega, na dado momento hende nan mester cuminsa pensa riba ruta nan alternativo y ser mas social cu otro, tene mas consideracion pa otro y coopera cu otro” sr. Pieters ta bisa.
sr. Pieters ta splica Bon Dia cu hopi hende ta lubida akinan cu trafico ta un evento social caminda bo mester ta social cu otro y bo mester tene cuenta. ”Mescos cu na un crusada normal, tin biaha bo ta haya tur cuater banda no tin borchi, y tur cuater banda tur auto a yega pa sigui stret, anto e ora aki un tin cu duna e otro un chens pa e trafico por sigui. Na dado momento como trafico cu ta pega tur dia , e ta importante pa bo baha bo velocidad y tuma cautela, wak bon y despues subi” sr. Pieters ta bisa.
sr. Pieters ta agrega cu nan a ripara cu na aeropuerto te ainda tin hopi accident pasobra na dado momento e persona mes ta kies un compartimento fout of a cuminsa core fout anto e ora ey kier bay cambia di direccion.”Ora bo drenta e compartimento cu bo a kies bo no mag di cambia di direccion mas, bo tin cu sigui den e vak cu bo ta. Na aeropuerto mas tanto nos ta wak cu e spiraal rotonde, for di unda cu bo drenta anto bo keda core den dje na dado momento ,ora bo ta yegando di tres salida e ta bay saca bo afo automaticamente. E mes ta asina diseña cu ora bo drenta for di wayaca anto bo drenta den full e parti paden, e ta manda bo afo ora bo yega esun di San Nicolas, e beton mes ta guia bo”, sr. Pieters ta bisa. ”Pa motibo cu nos trafico ta birando mas y mas hopi tur aña, anto na dado momento tambe pa rotonde no pega, a bin cu solucion di pone compartimento di sortia riba rotonde. Antes bo tabata yega, drenta un rotonde anto den e rotonde bo ta sortia anto wak direccion bo kier bay, pero aworaki prome cu bo subi un rotonde bo tin cu dicidi e ora ey ki direccion bo ta bay di antemano” , sr. Pieters ta splica.
Tin alrededor di 200 rotonde mas pa wordo traha
Sr. Pieters ta conta Bon Dia cu tin alrededor 200 rotonde mas riba lista pa wordo traha y varios crusada nan cu ta considera peligroso na unda accidente pisa y grandi a yega di sosode probablemente tambe lo bira un rotonde.
” Cu rotonde tin biaha bo ta haya cu sinembargo trafico ta bay pega un tiki, pero sikiera pa motibo pone un rotonde bo ta alivia e trafico en bes di bo laga un crusada normal, pues e rotonde nan sinembargo ta evita cu e accidente nan no ta bira pisa ” sr. Pieters ta bisa.
Un ehempel di esaki segun sr. Pieters ta e rotonde banda di Universidad di Aruba cual tabata un crusada cu antes tabata tin bastante accidente pisa y despues cu a bin un rotonde eynan tog e accidente nan a rebaha hopi. ”Asina medida nan ta wordo tuma, nos ta wak tambe na e crusada banda di Pius School na Dakota, bo ta wak tambe cu eynan tambe tabata tin un crusada un tiki fastioso cu hopi accident anto desde cu a pone plataforma di trafico, cual na cuminsamento tabata tin basta reclamo cu a bin hopi plataforma na Aruba, pero e plataforma a rebaha e velocidad cu aworaki casi no tin ningun accidente na e crusada ey mas” , sr. Pieters a bisa.
