ORANJESTAD – E posicion di Aruba tocante e asunto di Venezuela no ta uno facil, asina prome minister Evelyn Wever-Croes a yega di expresa recientemente. Ya cu nos ta un isla cerca di Venezuela y nos ta como pais practicamente meymey di e situacion aki.
Pero tambe el a referi na e discusion internacional cu ta tumando luga tocante e reconocimento of no di presidente di asamblea nacional di Venezuela, Juan Guaidó, como presidente di e pais. E asunto aki ta cay bou reino Hulandes cu mester a fiha un posicion. Sinembargo -segun e prome mandatario- como pais den reino, Aruba a trece su posicion dilanti, caminda nos ta prefera di tene un relacion di paz cu nos bisiña, en bes cu nos ta wordo uza pa e paisnan Europeo den nan lucha.
Riba e punto aki, nos prome mandatario a papia cu secretario di estado di Reino, Raymond Knops. Hulanda kier haya un posicion unanime dentro di Union Europeo (UE). Nan ta wardando ainda e decision final si UE ta reconoce Guaidó como presidente di Venezuela. Mientras otro paisnan manera Merca a reconoce explicitamente Guaidó como presidente.
E fin di siman aki, Union Europeo a duna un ultimatum pa presidente Nicolas Maduro anuncia e convocatorio pa un eleccion nobo na Venezuela. Sinembargo, Maduro a reacciona bisando cu: “Niun hende por duna nos un sorto di ultimatum asina.”
Aruba tin un posicion dificil den henter e desaroyo aki. For di dia 10 di januari ultimo, Hulanda como parti di UE a indica caba cu no ta reconoce Nicolas Maduro como presidente nobo di Venezuela. Tambe Hulanda ta reconoce Guaidó y Asamblea Nacional como e unico organo legitimamente eligi na Venezuela. Sinembargo, loke reino Hulandes no a haci ainda, ta reconoce tambe Guaido como presidente di Venezuela.
“Mi kier pa henter Aruba sa cu nos ta den estado di alerta pa mira si tin cualkier eventualidad,” premier Wever-Croes a bisa. El a agrega cu e departamentonan concerni ta prepara pa atende cu cualkier eventualidad.
