ORANJESTAD – Aruba, compara cu otro paisnan, tabata atrasa den e tema di psikiatria y salud mental. Ddurante un entrevista cu Bon Dia Aruba a haci cu Dr. Hendrikus van Gaalen, psychiater y director medico di Respaldo Aruba, el a splica con e departamento di Respaldo Aruba ta trahando awo y e obhetivonan cu nan tin pa e aña aki.
Dr. Hendrikus van Gaalen a duna di conoce cu Respaldo Aruba a cuminsa un aña y mey pasa, cu un grupo y espacio chikito cu e obhetivo di bira mas grandi cu tempo debi y e personal califica. Asina Hendrikus a bisa cu gobierno, AZV, hospital y psikiatranan a uni, pa motibo cu ta hopi importante pa e pais no keda mas atras. Nan como ekipo a pensa di pone e clinica cu psikiatranan, pa pone un fundacion na un banda cu ta mas moderno, mas lihe y di un calidad mas halto, cu e fin di por cambia psikiatria na Aruba.
Idea di Respaldo, segun Van Gaalen, ta enfoca riba e partinan mas importante, di cual e prome ta pa traha mas ambulatorio. Nan tin como idea tambe di pone un policlinica grandi na Playa y otro na San Nicolas, aden ta inclui atencion pa hende adulto, muchanan, adolescentenan y un FACT Team (Flexible Assertive Community Treatment) dedica pa traha cu hende mas malo cu tin.
El a splica cu e FACT Team ta trata multidisciplinario, ta trata un pashent na unda e ta biba, e ta flexibel ya cu e team por subi su frecuencia di bishita te cu tur dia, of lo por bah’e, depende con e pashent ta. Si tur cos ta stabiel, e ta bira un case-management door di un miembro di e team, si e pashent ta malo, full e team ta conoce y trata e pashent wisselend.
Esey ta un grupo di Aruba cu no a haya basta atencion, na Respaldo manera Dr. Van Gaalen a expresa nan a cuminsa traha mas cerca di e hende, no pa pone un persona den un clinica, laga pa nan cura y pone nan bek den un cas di bishita, Dr. a bisa cu esey no ta un bon manera.
FACT Team ta componi di un grupo di un psikiatra, dos psicologo, enfermeronan, y trahadonan social. E idea ta cu e grupo lo por crece pa traha un di dos grupo na San Nicolas. Nan ta bishita e hende, bay cerca e hende, bay cu e famia, papia cu e bario, papia cu polis, un trato moderno cu calidad halto pa e hende mas malo cu Aruba tin.
Hendrikus a bisa: “Nos tin cu traha mas cerca hende, mas den bario, mas cerca di nos clientenan.” Mester kita e stigma di e hende cu ta bisa cu esey ta dificil pa psikiatria, por ehempel na Hulanda tambe ta existi, si un hende tin problema mental, no ta facil pa un persona admiti cu tur hende por haya un malesa mental. Van Gaalen a bisa cu na Hulanda e dokternan di cas tambe ta traha cu pashentnan cu tin un malesa mental cu ta mucho grandi. Ademas, Van Gaalen a conta tocante e policlinico pa mucha, cual tabatin tres hende, un psikiatra, un psicologo y un ortopedagogo. Awo nan a inclui un trahado social, y mas personal cu ta completa pa shete hende, cu a facilita e trabou pa e pashent cu mester di un afspraak mas lihe.
Den e luna aki, el a splica cu su ekipo ta trahando duro pa baha e tempo di spera di e pashent. El a bisa cu un aña pasa, e tempo di espera pa un afspraak tabata di ocho luna, awo nan a baha e tempo pa un luna. E pashent mas importante ta e muchanan, cu no por warda tanto tempo asina y nan a pone enfasis riba e policlinico di mucha. “Un mucha cu problema mental no por warda hopi tempo, mas tempo nan ta warda, mas malo nan ta keda” Van Gaalen a comenta.
Van Gaalen a enfatisa cu nan mester mehora e manera di traha na e clinica. Nan a cuminsa drecha cos pa haci e mas moderno, nan ta cambiando e tratamento den dia, y el a bisa cu prome di juli nan ta cla cu esey. Tambe parti di trahadonan cu ta traha hopi bon, pero tambe mester bira mas moderno, pa haya mas educacion pa nan sa con por traha cu pashentnan cu ta hopi malo. Van Gaalen a anuncia cu fin di e aña aki nan lo crea otro FACT Team y tambe nan lo por haya otro edificio den Playa cu policlinica. Nan tur lo por haya un edificio mas grandi hunto cu e FACT Team, policlinica pa adulto y pa mucha, y si esey bay bon, nan lo cuminsa cu otro edificio na San Nicolas. Ademas, el a duna di conoce cu na Aruba, e principal trastorno cu ta afecta e muchanan ta Attention Deficit Hyperactivity Disorder (ADHD), muchanan hiperactivo, of cu nan no por concentra, mientras e di dos ta Autismo y di tres e trastorno di Miedo.
Entre adulto, Van Gaalen a expresa cu e trastorno mas comun ta depresion, na Aruba y rond di mundo, despues ta sigui trauma, y despues ta bin psicosis y esquizofrenia. Pa finalisa, Van Gaalen a bisa cu ‘nos no ta yega na un bon pais si nos no ta traha hunto, y laga nos purba haci nos best p’esey y confia otro un tiki mas, pa Aruba su salud mental”.
