Ministerio di Asunto Social a informa cu despues di un proceso largo, unda tabatin varios candidato, finalmente departamento di Asunto Social lo conoce un director nobo.
Bon Dia Aruba a papia cu minister di Asunto Social, sr. Paul Croes kende a abstene inicialmente di divulga e nomber di e director nobo di e departamento importante aki, pero si a duna nos un profiel di e proximo funcionario aki.
Director nobo
El a declara cu dialuna pasa nan tabatin e ultimo entrevista cu e candidatonan, y un di nan lo bira e director nobo. E ta un ser femenino y un persona hopi bon prepara, segun e mandatario. Nan kier haci e presentacion oficial di dje den Conseho di Minister y p’esey su nomber no a wordo divulga publicamente.
“Mi ta kere cu nos comunidad lo mira cu ta un persona cu un amplio conocemento di e sector social”, el a bisa. E persona cu lo keda nombra den e funcion aki no ta un persona cu ta bibando actualmente na Aruba sino na Hulanda, pero e ta un yiu di tera.
El a traha hopi aña den e sector social y e ta conoce e materia di subsidio y di integracion di persona den e mercado laboral. Tambe el a traha den e sector social muy specialmente den e guia psicologico y como trahado social.
El a indica cu e proceso pa yega na un directora nobo berdad a dura, pero pa logra un bon resultado bo tin cu dedica hopi tempo na dje. E mandatario a tuma nota cu den prensa a bin cu criticanan cu e departamento aki ta sin guia. E ta reacciona bisando cu e tipo di critica aki no ta corecto. Tin un directora adhunto cu ta guia tur e proceso den e departamento y bo tin varios hefe di seccion di e departamento aki pa pone cana cualkier proceso.
Tarea directora nobo
El a bisa cu e rol di un departamento asina y cu e ta considera cuater pilar cu e ta para pa nan, ta: Apoyo material pa e personanan den necesidad, hobennan, famianan y persona cu limitacion. “E tarea di un directora nobo ta uno sumamente importante pa ehecucion di e maneho cu nos ta propone”, el a bisa.
Mandatario a bisa na e matutino aki cu e enfoke nobo di e directora ta esun di dirigi e personal di e departamento aki. “Nos kier un personal contento, nos kier un personal motiva….”, el a bisa. Dor di esaki nan kier mira mas eficiencia y mas eficacia den e trabounan, y mas cordialidad con pa atende e clientenan cu ta bishita, y cu trabou cu ta cuminsa lo por termina.
Mehoracion di servicio social
Banda di esaki e mandatario a indica cu nan kier mehora e servicio social pa henter comunidad. E servicio aki ta wordo dividi entre yuda material y inmaterial. E ayudo material e ta menciona e apoyo psicologico y apoyo social y guia di famianan. E parti material tin di haber cu e aspecto di onderstand. Na e momento aki alrededor di 2 mil famia ta ricibi e apoyo social aki directo.
Tambe – e mandatario a laga sa- cu tin fundacion cu nan ta subsidia manera Fundacion Pa Nos Comunidad cu tin un bon acuerdo cu departamento di Asuntonan Social pa yuda e hendenan den necesidad cu elementonan basico manera cuminda. El a menciona e cooperacion cu Cruz Cora cu tambe ta parti di e red di ayudo social pa nos hendenan den mas necesidad y cu actualmente ta ricibiendo un apoyo di 15 mil florin a base di Feria Social. E ta un proyecto cu gobierno tambe ta encabesa.
“E esfuerso pa apoya nos comunidad ta amplio”, el a bisa. Pero el a agrega cu naturalmente nan no por kibra tur e necesidad den un solo manera pero cu tur e cooperacion aki, e ta kere cu nan ta yegando leu.
Un punto cu e ta motiva hopi ta esun di e propio iniciativa di nos ciudadano pa bay traha ya cu pa motibo cu un hende ta traha e persona ta haya un stabilidad financiero pa sali di e situacion dificil y instabil economicamente cu ta trece cun’e necesidad manera falta di alimento y otro necesidad material.
