Cantante Chris Brown y dos otro persona a ser aresta na paris, despues cu un muhe a denuncia nan pa violacion, segun autoridadnan Frances a declara ayera.
E cantante ganador di Grammy Award a keda deteni dialuna pasa bao sospecho di posible violacion agrava y cu infraccion relaciona cu droga y a keda bao aresto ayera, un funcionario hudicial a declara. Investigadornan tin dos dia mas pa dicidi si ta laga Brown liber o ta cuminsa caso contra su persona.
Personanan responsible pa Brown su publicidad na Sony Music no tabata dispuest di comenta riba e caso o bisa kico Brown tabata haci na Paris. Su abogado na Merca, Mark Geragos, no a responde inmediatamente riba peticion pa comentario.
Brown tabata repetidamente den problema cu husticia desde cu el a admiti culpabilidad den e caso di violencia na 2009 contra su novia di e tempo ey, Rihanna. El a completa su periodo di prueba den e caso ey na 2015, pero el a keda haya problema cu polis.
E muhe cu a deposita denuncia den e caso na Paris a bisa cu el a topa cu Brown y su amigonan den marduga di dia 15 pa 16 di januari na e club Le Crystal den e di 8 ‘arrondissement’ cerca di Champs-Elysees, y despues nan tur a bay na Mandarin Oriental Hotel, cerca di Place de la Concorde den centro di Paris, segun e funcionario du husticia. Mandarin Oriental no kier a comenta encuanto e investigacion, y no por a comunica inmediatamente cu Le Crystal.
Un di e bodyguardnan di Brown ta entre esnan deteni den e investigacion. Nan ta bao custodia di polis hudicial na e di 17 arrondissement di Paris, segun e funcionario. Ningun funcionario tabata autorisa pa publicamente discuti e caso. E detencion a keda reporta originamente pa e revista di redashi Frances, Closer.
