Rutte cu bishita ‘relampago’ A atende algun asunto interesante

E bishita ‘relampago’ di premier Rutte na Aruba a duna, pa cortico cu e ta, un bista riba algun asunto cu ultimamente a haya bastante cobertura caba, y cu lo sigui bolbe riba mesa. Logico tambe pasobra nan ta punto di atencion en general.

En todo caso, no tabata e impresion cu a bin atende problema urgente y grandi, y e ambiente tabata mustra hopi relaha. Esey no ta implica cu nos por relax anto, pasobra e preocupacionnan grandi a keda… wel, grandi. Durante e encuentro cu prensa premier Rutte no a bay den detaye tocante e situacion financiero, ni tabatin pregunta di prensa al caso, pero mantene e rumbo di e barco den direccion positivo lo ta bay resulta bastante dificil e aña aki. E premier di Hulanda a toca esaki levemente mustrando riba e importancia di amplia e base economico di Aruba. No cu e mester bisa nos pa nos sa, pero mas bien pa indica e limitacion di un economia cu di un banda tin un turismo fuerte, pero cu riba su mes no ta bay tin suficiente horsepower pa lastra tur e peso. Remarcable ta cu no a menciona sikiera e tema di e refineria, aunke cu a papia di Venezuela si, pero estrictamente riba e problema di refugiado.

Obviamente e mandatarionan na mesa tabata un unidad solido, no mustrando ningun diferencia di opinion riba ningun tema, y no a laga e preguntanan di prensa provoca tampoco pa bay den detaye cu por a conduci na esaki. Supuestamente no tin ningun diferencia di opinion den e asunto di e refugiadonan na principalmente Aruba y Curaçao, pero no mucho tempo pasa tabatin algun punto skerpi pa discuti. Si mientras tanto nan a yega na otro, esey ta bon noticia, pero e no tabata asina. Dos cos importante tabatin; un ta e asunto di posible violacion di derecho humano di persona ilegal o refugiado, principalmente den e forma y condicion di detencion. Esey no tabata tanto e tema na Aruba. E otro aspecto tabata e ayudo Hulandes cu e islanan tabata spera y cu no a haya. Den e rueda di prensa a bin na claridad cu Aruba tin trabao pa haci ainda, analisando e situacion mas completo posible y poniendo un ‘prijskaartje’ na e plan, pa seguidamente, si mester, por consulta cu Hulanda kico lo ta nan aporte, segun nos prome minister. Bunita bisa, pero esaki ta indicacion, manera nos a yega di vocifera anteriormente, cu no tabata duna e pruebanan paplpable na Hulanda di un berdadero invasion di refugiado.

Manera e mandatario a formula corectamente, Aruba a manera absorba e fenomeno, no tin hende drumi riba caya, nada di e cosnan ey. Motibo pa na Hulanda, manera nos a pronostica, nan lo a bisa cu nan no ta mira e problema di ‘refugiado’. Nan ta mira un problema di ilegal, cu ta di escala menor, cu e pais mes mester atende, loke nos ta trata di haci caba desde fin di añanan 80 di siglo pasa, y cu nunca nos a logra gana premio cune. Si acaso nos tabata kier a impresiona e Hulandesnan cu cifra, anto tabata posible pa nos tin nan. Manera nos a yega di trece dilanti mas biaha, mayoria di e stranheronan, y esey ta conta tambe pa e Venezolanonan, ta drenta via aeropuerto, y den menor grado, via waf. Contal cu tur esnan cu ta drenta como turista, y nunca ta sali, ta bon registra den un sistema digital, cu nomber, fam, nacionalidad, etc. Djis conta un 10 o 15% acerca pa loke ta drenta via lama, anto bo tin un calculacion bastante corecto di cuanto Venezolano, o hende di otro nacionalidad nos tin aki ilealmente. Ya cu nos prome minister mester presenta un plan mas detaya, e por inclui e conseho aki.

E pregunta encuanto e areglo di disputa a trece un momento di posible tension, pero habilmente Rutte a pasa e pregunta pa su colega Knops, cu segun e premier “sa hopi mas di e asunto aki cu mi.” Knops cu mesun habilidad no a contesta e pregunta, a bay describi procedimento pendiente, y a laga e asunto asina. Ta berdad cu e islanan, si nan kier haci un diferencia ainda, por bay purba pasa mocion den Tweede Kamer pa modifica e texto di ley, pero ta parce nos masha improbable cu riba punto esencial, y e veredicto di un instancia independiente, anto ‘bindend’ ademas, ta algo cu nunca lo haya un mayoria den parlamento Hulandes p’e. Esey tambe ta e incomodidad cu por a sinti di parti di Knops, cu no ta bisa esey cu tanto palabra. Tin otronan cu si a hacie, manera e website Koninkrijksrelaties.nu unda sin mas a vocifera cu esaki hamas lo tuma lugar.

Y, mientras cu nos ta comprende cu pa nos politiconan, no tur ademas, esaki ta un issue hopi importante, pa e resto di comunidad esaki ta hopi menos. Muy probablemente, cu e aprobacion di e ley di Reino aki na mita di aña, e asunto ta termina sin cu e mandatarionan di e islanan a haya loke nan tabata desea. Hulanda ta mira tur esaki como un eror cometi 8 aña pasa y kier cera e capitulo, punto.