ORANJESTAD – Hecho cu gobierno di coalicion (AVP-POR-RED) a dicidi pa e pensionadonan keda cu e reparatietoeslag di 125 florin, cu inicialmente un grupo di pensionado no tabata hay’e, ta un asunto cu mester atende pronto cu e colegio di supervision finananciero CAft.

Minister di finansa y asunto economico, Xiomara Ruiz-Maduro a laga sa cu e decision tuma diabierna ultimo pa sigui paga e reparatietoeslag di 125 florin na tur pensionado -sin haci distincion entre ken ta haya mas of menos- e no ta kere cu esaki lo tin consecuencia riba e acuerdo cu gobierno tin cu CAft pa loke ta e bahamento di gastonan for di presupuesto 2019.

E no ta descarta cu den su prolongacion, gobierno lo por haya cu CAft lo bati nan porta y duna un comentario riba e decision aki, ya cu e ta algo cu no a wordo presupuesta. Pero poniendo e situacion den contexto –segun e mandatario- CAft mester compronde cu como gobierno nan mester di espacio financiero pa por traha den e pais aki. Y e ta sigur cu ora e momento yega, nan como gobierno lo sa di dialoga cu CAft riba e asunto aki.

El a agrega cu e gobernacion di e pais aki tin como tema central e hendenan. P’esey ora cu nan a tuma e decision pa paga tur pensionado e reparatietoeslag sin kita nada -pero teniendo na cuenta e retonan administrativo- nan ta haya cu no por perhudica e hendenan pa cumpli cu e reglanan di CAft. El a señala cu esaki a sosode debi na foutnan presenta den nan sistema administrativo. E ta un fout cu no a bin awor, sino cu e tabata existi caba, y e ta un reto cu como gobierno nan mester a trata cune, segun e mandatario. Na su debido tempo nan lo trata cu CAft tambe ariba e situacion aki. Pero den e contexto cu gobierno di Aruba mester tin espacio pa por traha na beneficio di nos pueblo.

Gobierno y CAft
E mandatario ta reconoce cu for di cu na aña pasa nan a introduci e crisisheffing, caminda nan a dicidi duna 25 florin extra pa compensa esaki, nan a bin cu un cambio riba pagamento di e reparatietoeslag di 125 florin pa nos pensionadonan, y e implementacion aki mester a tuma luga.

Esakinan considerando –segun e mandatario- cu den e reforma fiscal e pensionadonan ta haya cosnan extra tambe. Nan a baha e prima di AZV cu e pensionadonan ta paga di 10.5% na 6.5%. Tambe e aña aki e pensioen di behes ta subi cu 42 florin pa pareha casa y 25 florin pa pensionado soltero pa luna adicional. Sinembargo corectamente, Banco di Seguro Social (SVb) cu ta maneha e fondo di pensioen a bati e bel y pidi gobierno aclaracion riba e asunto aki. E mandatario a indica cu e retonan administrativo a haci cu mester por a tuma un decision pa no crea e discriminacion den caso cu SVb lo ehecuta e decision di gobierno. Mirando e decision cu gabinete Wever-Croes a tuma recientemente pa tur pensionado sin excepcion sigui haya e reparatietoeslag di 125 florin, lo haci cu gobierno ‘tin cu busca e fondo aki cu no a wordo presupuesta,’ asina minister Ruiz-Maduro a declara.

Un biaha mas el a referi na e situacion di deficit financiero cu nan a hereda for di e gobiernonan anterior (Mike Eman I-II), nan ta haciendo awor un esfuerso pa recupera nos pais for di dje. Den cuadro di esaki, e mandatario Ruiz-Maduro a bisa cu nan splica CAft, y tambe e siman aki nan lo bolbe splica na minister Hulandes di asunto di reino, Raymond Knops, e situacion aki.

E ta un asunto cu tambe gobierno lo trata cu e bishita cu prome minister di Hulanda, Mark Rutte a realisa nos isla ayera. Segun e mandatario, nan a yega di trece e asunto aki cerca e vice presidente di Raad van State, Thom de Graaf, caminda nan a bis’e cu Aruba tin mester di espacio pa asina gobierno por traha riba solucionnan. Ya cu e daño financiero cu nan a hereda ta ‘hopi grandi’ cu lo tuma te aña 2039 pa solucion’e debidamente.