Trinta y un dia desde comienso di e shutdown parcial di gobierno federal y no tin perspectiva ainda di un posibel acuerdo entre e Democratanan, cu desde e luna aki tin un firme mayoria den Camara di Representante, y gobierno di presidente Donald Trump.
Diasabra pasa Trump a propone un apertura, por lo menos segun su propio opinion, un suavisacion temporal di su politica pa cu e ‘dreamers’ (hobennan treci na Merca ilegalmente como mucha) pero no a hala su exigencia di kier US$ 5,7 biyon pa construi e muraya na frontera cu Mexico. E Democratanan a rechasa su propuesta inmediatamente.
Trump diadomingo pasa a yama lider Democrata di Camara di Representante Nancy Pelosi un “radical” cu segun e tabata actua iracionalmente. E presidente tambe a purba para critica di banda conservador politico, acusando Trump di considera “amnistia” pa inmigrante ilegal.
“No, Amnistia no ta parti di mi oferta,” Trump a skirbi riba Twitter diadomingo, indicando cu el a ofrece extension temporal pa tres aña, di permiso, no estadia permanente. Pero el a añadi: “Amnestia lo por usa solamente riba un deal hopi mas grandi, sea pa inmigracion o algo otro.”
E critica di ambos banda ta ilustra e posicion di Trump, mey mey di dos extremo, mientras e ta purba gana algo di apoyo di algun Democrata, sin perde su base Republicano. Cu cienmiles di empleado federal sin pago pa otro periodo, e asunto a pasa pa Senado unda lider di mayoria (Republicano) Mitch McConnell a bay di acuerdo pa trece propuesta di Trump na votacion e siman aki. Democratanan ta bisa cu tin poco probabilidad cu e medida ta alcansa e 60 votonan necesario den e caso aki, ora ta trata di legislacion. E Republicanonan ta mantene un mayoria di 53-47 cu ta implica cu nan mester algun voto Democrata pa pasa ley.
