ORANJESTAD – Siman pasa e caso hudicial cu e nomber Ibis a cuminsa den Corte di Prome Instancia. E acusacion di 23 persona ta duna un indicacion caba di e magnitud di e caso, pero tin mas detaye.

Cu alrededor di 20.000 pagina di documentacion esaki, segun nos opinion, e no ta solamente e caso mas grandi di historia di Aruba, pero ta resalta pa algo mas. Si nos sa cu den henter un aña e Secretaria di Corte (Griffie), segun un conocedo cu nos a consulta, ta produci un poco mas cu 60.000 pagina, pa tur caso hunto, anto nos ta cuminsa haya un impresion con grandi realmente e caso aki ta. No cu el a dura hopi tempo, cu e comentario necesario riba esey den medionan di comunicacion, pero si acaso a hiba un conteo di ora di trabao, sin duda algun esaki lo a resulta tambe e caso mas caro cu Aruba a conoce, probablemente e daño ta core den miyones. Ta di spera cu nos pais no mester haya mas di e categoria aki.

Despues di e tratamento durante siman pasa, diabierna ultimo e fiscal a cuminsa cu su ‘requisitoir’ pero no a finalisa, loke probablemente lo tuma luga awe dialuna, pa despues yega na su exigencianan di castigo pa e diferente acusadonan. Si el a referi na e magnitud di e caso y e castigo corespondiente cu e acusado principal lo por haya, comparando esaki cu e caso na Corsou di e ex-Prome Ministro Schotte. Ta di comprende cu a yega na e conclusion cu e caso Ibis ta di un magnitud bastante superior. Ta trata di un actividad delictivo, segun Ministerio Publico, cu a dura añanan largo, envolviendo un gran cantidad di empresa y empresario cu tabata paga pa e servicionan cu e ministro tabata haya pidi y tabata brinda, segun e acusacion di Ministerio Publico. Ta pesey tambe cu e acusacion formal ta contene e elemento di a set up un organisacion criminal, unda e caso Schotte tabata trata di un solo empresario cu a cumpra pa un suma grandi, influencia directo riba gobernacion di pais Corsou; un delito hopi serio tambe. Indicacion tambe di e organisacion criminal ta cu practicamente henter e despacho di e ministro tabata envolvi, salvo algun excepcion, den e organisacion aki: chauffeur, secretaria, asesor…

Den su intento pa ilustra e magnitud di e caso Ibis, ministerio publico ta papia di un “fabrica di ontheffing” loke no ta nada straño ora ta constata e cantidad grandi di e tipo di decision aki di e mandatario pa maneha asina un parti considerabel di e peticionnan haci durante e tempo cu segun ministerio publico, e tabata activo cu e delito aki. Segun nos informacion tabata trata na tur di alrededor di 2300 ontheffing, mientras ministerio publico ta maneha un cifra menor. Ni si e no a cobra nada den ningun caso, ainda lo tabata trata di un maneho totalmente reprochable, sacando trabao di empleado publico hiba na su despacho y poniendo un stempel fuerte di su maneho riba e totalidad, sin cu tabatin un bista riba kico e maneho laboral tabata basa.

Ta pesey ta di comprende cu ministerio publico a laga sa cu den e caso aki e sospechoso principal por bay conta cu un castigo bastante mas halto cu loke a exigi den caso di e ex-Prome Ministro.

Metodo di investigacion
For di e desaroyo den corte ta bin dilanti tambe e metodonan aplica den e caso aki, unda por bisa cu nada a keda sin uza, aparentemente. Durante un periodo largo a ‘tap’ telefon di diferente persona, loke a resulta den un cantidad considerabel di prueba, cu ta dificil di refuta.

Tambe e haya acceso na e mensahenan di Whatsapp, algo cu a bira un instrumento valioso ora cu husticia, caso dado, por dispone di esakinan tambe, fruto di confiscacion di varios celular di e sospechosonan. Durante tur e tempo ey e acusadonan aparentemente no a ripara nada, ni a tuma ningun tipo di precaucion, loke ta duna di pensa cu nan tabata pensa cu no tabatin ningun obstaculo pa actua di e manera aki. Un bentaha grandi pa e investigadonan tabata cu e trayecto di permiso aki conoce un ‘paper trail’ bastante extenso, cu ta yuda hopi pa reconstrui cierto suceso.

Otro aspecto interesante di e caso ta e labamento di placa, unda e fundacion di e ministro a hunga un papel importante. Den esaki por ta cu e poco control formal den nos leynan cu tin riba fundacion en general, a haci e tentacion grandi pa uza esaki como vehiculo pa transferi placa via e canal aki. E problema di esey ta resulta despues, manera den e caso aki, cu dia husticia yega na porta di un fundacion asina, ta resulta cu toch ta dificil pa sconde cos y esunnan cu tabata opera e fundacion ta resulta parti di e organisacion criminal.

Por ta cu den e siman aki, ora cu abogadonan cu ta defende e diferente acusadonan bin na palabra, cu aki tambe nos ta bay mira otro paralelo cu e caso Schotte. Den e caso aya e abogadonan no a purba refuta e pruebanan cu el a haya e pagonan di e doño di casino Corallo, pero mas bien a concentra riba purba proba cu parti di e evidencia a ser adkiri di manera ilegitimo.

Un bes a pasa e stacion ey, cu hues aceptando e pruebanan den prome instancia, y sigui pa Corte Comun cu a haci mescos den segundo instancia, realmente e caso tabata perdi y un cuestion di tempo, cu por dura par di aña, si e sospechosonan, en todo caso e acusado principal, apela e caso, loke ta parce casi sigur, mirando e reaccion di e sospechoso te na e momento aki, unda e no ta admiti ningun delito. E problema grandi cu e abogadonan lo tin ta e presencia di asina hopi prueba, di asina hopi caso. Sin cu kier anticipa kico e veredicto den e caso ta bay ta, e ta mustra manera un ‘uphill struggle’ pa e defensa.