ORANJESTAD – Hefe di Departamento di Higiena y Inspeccion di Alimento, Yvette Geerman a declara cu Departamento di Salud Publico ta realisando su control riguroso durante e diferente paradanan y actividad di Carnaval 65.“Si tin cosnan cu nos ta constata cu no ta cumpli, nos ta tuma nos accion,” el a bisa.

Durante e dianan cu a transcuri di e temporada di Carnaval 65, no a constata niun caso durante e control cu nan a realisa. Durante e prome actividad di e parada di flambeu nan a bay controla. Tambe durante actividad di Prins y Pancho, y te aworaki tur cos ta na ordo. Sra. Geerman a declara na Bon Dia Aruba cu te aworaki durante nan control tur cos ta bayendo ‘hopi bon.’

El a agrega cu como Salubridad Publico nan ta hopi satisfecho mirando cu, por ehempel, ultimo tempo nan a pone hopi atencion pa e bendedo di cuminda tin su jug cu awa. Nan ta mirando cu hopi di nan ta cumpliendo cu e rekisito basico aki. Pero tambe e uzo di habon y un serbete limpi. Ta puntonan importante, ya cu e ta cualifica nan como e base di limpiesa pa evita di transmiti malesa, ora cu e hendenan ta bay cumpra cuminda.

E echo cu tur cos ta bayendo bon no kiermen cu nan no lo sigui fortalece nan control. Departamento di Salud Publico lo continua cu tur su control durante Carnaval 65. Nan ta un team completo cu ta controla y ta sigui pone atencion riba tur e rekisitonan cu nan ta pone como exigencia pa esunnan cu ta bende cuminda y bebida.

Tipo di sancion
Sancion ta depende kico nan ta constata na momento cu nan ta haci inspeccion. El a trece dilanti, por ehempel, cu si durante un accion di control nan ta bay cu nan thermometer, y si esaki ta indica cu tin un cuminda cu ta afo di su zona di temperatura, nan ta bay check si e cuminda berdaderamente ta den mal estado.

Si e cuminda ta den mal estado y e no ta hole bon, e persona ey no mag di bende cuminda mas. Tambe persona cu no tin nan carchi di salud, tampoco no mag di bende cuminda. “Ta depende di kico nos ta constata na momento cu nos ta bay controla,” el a bisa.

Como Salubridad Publico, tur esnan cu a bin na remarca pa haya un permiso pa bende cuminda y bebida, nan ta duna un foyeto cu informacion al caso riba maneho adecua di cuminda y bebida.

Tambe esunnan interesa por haya conseho via telefon riba e stepnan cu nan mester haci pa asina nan por cumpli pa nan cuminda por ta safe pa consumo publico. Esaki ta un forma pa evita cu algo malo por bay robes cu e consecuencianan cu esaki por trece cune pa salubridad publico.