‘Nos tin e potencial pa ta un Isla innovativo, artistico y creativo’

ORANJESTAD – Den un reciente entrevista cu Edjean Semeleer di Go Cultura, el a splica tocante importancia pa pueblo di Aruba sa di unda nan ta bin, pa por mustra e orguyo di e pueblo, pa sa con pa ta embahadornan di nan pais. Ademas, a conta tocante proyectonan pa Go Cultura.

Semeleer a bisa cu Aruba su economia ta depende 80% di turismo, sinembargo e ta bisa cu e turista mes, nan ta turista experimental. E remarca cu e turista di awendia no ta busca lama, e solo of e clima solamente, sino ‘nan ta busca un experiencia autentico’.

Diferencia cu e otro islanan den Caribe, Semeleer ta bisa cu por ofrece mesun cos of mas bunita lamanan, pero cada isla por ta sumamente autentico. “Nan sa kico ta haci nan cultura, con diverso y con nan ta preserva nan herencia cultural. Eynan nos ta mira cu Aruba tin hopi potencial. Pa motibo cu nos ta isla creativo, innovativo, un isla artistico. Mi ta bisa cu tur hende tin un habilidad.”

Segun Semeleer ,si hende di afo no sa di unda ‘nos ta bin’, na scolnan no ta haya e historia adecua, no por crea embahadornan orguyoso di nan pais. Tampoco ta consciente cu e pais ta diverso, tin diferente nacionalidad cu a forma. “Cultura mester crea un sentimento cu tur hende ta sinti nan mes inclui den dje. Pa nan sinti cu nan ta parti di algo mas grandi y kier traha p’e. Si no tin esey, tanto bal bo kier papia cu turista bisa cu nos ta autentico.”

Segun Semeleer, tin hopi artista den e plataforma cu ta creando. Nan lo t’ey pa duna otro oportunidad; pa e motibo aki, e ta bisa pa persona compronde cu no solamente e ta bay traha cu musica, e instrumento of e vocalista, pero tambe cu bailarinnan, poetanan, declamado, diseñadornan di moda y di joyas, artista di makiyahe y mucho mas.

E ta bisa cu tin varios persona cu por resalta y cu tin hopi disciplina. “Nan ta haciendo nan esfuerso pa por presenta algo cu por ta un exito”. Pa e aña aki, Go Cultura lo tin ‘hopi evento y proyecto’. Nan ta wak e manera algo sostenibel.

Un ehempel cu Semeleer a agrega, cu proyecto manera un di fotografia, ta pa e persona wordo exponi tambe den exterior. No solamente expone nan mes como artista, pero tambe como pais Aruba.

Den e luna di mei lo celebra diversidad multicultural. Nan lo haci presentacion di gran mayoria di nacionalidad cu ta bibando na Aruba den un show. E lo ta un evento grandi, unda cada representante, manera consul, lo atende y lo tin diversidad di cuminda, aunke ‘mas importante ta pa mustra mundo cu nos ta biba den harmonia cu otro’.

Segun Semeleer ta bisa cu e conflicto entre e nacionalidad no ta grandi, pero nan kier kibra cierto stigma. “E pensamento ta keda cu si e persona no a nace akinan, e no ta un Arubiano”, e ta remarca.

Tambe e ta agrega cu nan lo tin nan siguiente concierto, pa asina sigui cu e proceso pa e Economia Oraño. Semeleer a bisa cu mester duna mas importancia na e luga cu ta duna importancia na cultura. “Pa no laga un teatro keda bay atras, pa haci mantencion y mas grandi. Mester keda actualisa.”

Semeleer ta bisa cu den exterior, hende ta traha demasiado pa trata cu teatronan rond di nan pais, ‘pakico no na Aruba’. E ta sinti cu mester duna apoyo na comunidad cu tur e proyecto y programanan cu ta haci.

Pa cualkier hende cu tin un curiosidad pa locual GoCultura ta haciendo, of kico precies ta nan mision, Semeleer ta agrega cu por acerca; y tambe si kier forma parti di e movemento ta bon bini. “Nos no ta exclui ningun idea cu iniciativa, pa motibo cu nos sa con importante pa hende bisa cu nan ta bezig cu algo bon.”