Presidente di Colombia, Ivan Duque, a informa ayera cu hunto cu su homologo Chileno Sebastian Piñera, nan ta avansando den creacion di un organismo di integracion regional, cu ta reemplasa e Union di Nacionnan Sur Americano (Unasur), di cual el a anuncia retiro di Colombia na augustus pasa.
E mandatario a detaya cu e bloke comunitario nobo, cu no tin fecha pa inicio di su trabao, lo enfoca riba desaroyo di “politica publico” na defensa di democracia, independencia di podernan y economia di mercado, como tambe e inclusion di un “agenda social cu sostenibilidad y aplicacion debido.”
Dia 27 di augustus pasa, Duque a anuncia cu gobierno Colombiano a notifica Unasur e decision di retira di e bloke, considerando cu no a denuncia e “trato brutal” di estado Venezolano di e ciudadanonan di e pais ey.
“Nos a bin ta avansa combersacion cu varios presidente di America Latino pa Unasur yega na su final y cu lo inicia mas bien construccion di un etapa mas agil, cu menos burocracia, cu mas coordinacion di cooperacion,” e hefe di estado a agrega.
Ademas Duque a califica e creacion di Prosur como “importante”, pa motibo cu ta mustra cu e pais no ta defende democracia so, sino cu tambe ta busca “un coordinacion mayor pa termina cu e dictadura di Venezuela” y construccion di “un escenario miho di cooperacion” di e paisnan cu ta comprometi cu defensa di democracia den e region.
