Un corte Chines a sentencia un homber Canades na pena di morto ayera den un caso di contrabando di droga, mientras tension ta subiendo entre e dos paisnan pa e aresto di e ehecutivo halto di e compania Cines Huawei.
Den un repentino proceso nobo, e corte Chines den e provincia noreste Liaoning a anuncia cu nan a duna Robert Lloyd Schellenberg e castigo maximo, cambiando asina e sentencia duna na 2016 tempo cu nan a conden’e na 15 aña den prison.
E corte no a duna indicacion cu por cambia e sentencia ainda, pero ta parce cu destino di Schellenberg ta den e negociacionnan diplomatico encuanto e demanda Chines pa laga Meng Wanzhou, chief financial officer di e gigante di telecomunicacion Huawei.
Prome Ministro di Canada Justin Trudeau a condena e sentencia fuertemente, sugiriendo cu China tabata usa su sistema hudicial pa tuma represaya contra Canada. Den su comentario mas fuerte, Trudeau a bisa cu tur ais na mundo mester ta preocupa pa loke Beijing ta haci cu su sistema di husticia, aplicando arbitrariamente un sentencia di morto.
Pa caba di escala e crisis diplomatico entre e dos paisnan, un vocero Chines a bisa cu Michael Kovrig, un anterior diplomatico Canades, cu a keda aresta den un aparente venganza pa aresto di Meng na Canada, no ta bin na remarca pa inmunidad diplomatico. Schellenberg a ser aresta mas di cuatro aña y inicialmente a keda condena na 15 aña na 2016. Pero dentro di algun siman despues di e aresto di Meng na december un corte di apelacion di repente a revoca e decision ey, bisando cu e sentencia tabata demasiado suave, y a reprograma e proceso nobo, cu apenas cuatro dia di notificacion.
Despues di aresto di Meng, Kovrig y e empresario Canades Michael Spavor a keda deteni riba alegacion vago di seguridad nacional. Canada a inicia un campaña cu aliadonan pa logra libertad di Kovrig y Spavor. Merca, Gran Bretaña, Union Europeo y australia a expresa nan apoyo. Trudeau a yama presidente Trump siman pasa, y Cas Blanco a yama e arestonan “ilegitimo.”
