(LaPatilla/EFE) – E representante pa Politica Exterior di Union Europeo (UE), Federica Mogherini, a expresa ayera su “solidaridad” cu e presidente di Asamblea Nacional di Venezuela (AN, parlamento), Juan Guaido, despues di su breve detencion diadomingo pasa.
“UE ta mantene su solidaridad cu e presidente di Asamblea Nacional, e institucion di e pais cu a ser eligi democraticamente,” e portavoz di Mogherini a comenta den un comunicado.
Mi ta confia cu “e autoridadnan relevante lo garantisa su derechonan civil, su integridad fisico, como tambe di tur e miembronan di Asamblea Nacional, den linea di su mandato constitucional di inmunidad”.
E hefe di e diplomacia di UE a destaca cu tambe a ser aresta temporalmente dos periodista.
“Autoridadnan mester garantisa e respet total di e derechonan humano y di libertad fundamental, incluyendo libertad di prensa y di medionan di comunicacion,”el a sigura.
E detencion breve cu Guaido a sufri a haci e ambiente politico na e pais mas straño ainda, den cual e podernan legislativo (unico poder cu oposicion ta controla) y ehecutivo ta desconoce otro mutuamente.
Guaido, di e formacion politico Voluntad Popular (VP), a ser intercepta pa agentenan di Servicio di Inteligencia Nacional (Sebin) riba e autopista cu ta conecta Caracas cu La Guaira, estado Vargas, ora e tabata na caminda pa lidera un “cabildo abierto” y a keda deteni pa casi mey ora. Su detencion a birar conoci a traves di rednan social, unda a publica un video unda por mira con varios agente a tuma control di e auto cu e tabata aden.
Despues Guaidó mes a manda un mensahe via telefon pa su colaborador y compañeronan di partido, anunciando cu tabata liber atrobe, cu tambe a ser comparti riba rednan social.
