Diabierna pasa a yega un fin na e consulta bi-anual entre e parlamentonan den Reino, cu resultado mixto. Ta tende algun parlamentario bisa cu nan a keda satisfecho, pero nos no sa con grandi e satisfaccion realmente ta. No cu necesariamente nos ta di acuerdo cu tur loke a propone pa logra di antemano, pero riba algun di e temanan, unda lo a bay pa ‘bisa e Hulandesnan ey nan berdad’, nos no ta mira cu esey a sucede, ni cu a logra tanto.

Un di e motibonan cu segun nos no a logra un bon debate tabata pasobra tempran den e proceso ya caba e emocionnan a bay hopi halto, y cu esey e calidad di discusion ta bay atras. Laga nos trata di yega na un analisis un poco mas aleu den algun di e puntonan pisa.

E situacion na Venezuela y con esaki ta afecta e islanan, aki no a logra convence e Hulandesnan cu e situacion ta sumamente grave, manera nos por a lesa den algun publicacion na Hulandes, unda ta usa e palabra ‘zorgwekkend’, mientras ta dificil pa nos mes por comproba esaki. Y pakico esaki ta e impresion? Pasobra segun nos opinion no ta bin dilanti cu e cifranan cu contundentemente ta ilustra, si esey ta e caso, unda tur e ‘vluchtelingenstroom’ ey ta anto. Si como gobierno mes bo no por cuantifica e problema, si no por demostra cu cifra cuanto placa mester gasta, riba presupuesto, pa brinda albergue y alimentacion na un grupo considerable di refugiado/migrante, anto e Hulandesnan ta keda cortes, tin biaha un tiki menos cu esey, y nan no ta kere bo. Di ey ta bin e actitud di ‘we’ll see when we get there.’ Esey no ta bay cambia, a menos cu cosnan realmente cuminsa bay robez na Venezuela.

Pa loke ta e aspecto ey, hopi ta depende di e posicion cu e militarnan na e pais ey ta bay tuma. Nan ta keda apoya e gobierno corupto aki o nan ta yega na un entendimento cu oposicion politico, cu den e dianan aki a gana bastante prestigio, sin cu realmente e dictadura ta tribi mishi cu nan. E incidente cu e presidente di Asamblea Nacional, cu a keda aresta pa servicio di inteligencia y un rato despues poni den libertad atrobe, ta mustra riba cierto cautela cu e regimen no tabatin un par di siman pasa. Tin indicacion cu discretamente ya tin negociacion ta tumando lugar, sin cu algun resultado a sali den publicidad. Talvez cu e Hulandesnan ta contempla tur esaki y ta pensa cu lo no ta necesario mas pa prepara pa un berdadero invasion, si yega na un gobierno di transicion.

E presion riba presidente Maduro ta hopi grandi, ya cu tin hopi asunto cu nan no por regla mas, ni cu Merca, ni cu Union Europeo, ni cu mayoria di nan bisiñanan. Imagina cu den cantidad di asunto, manera renoba contrato o convenio encuanto transporte maritimo o aereo, por ehemplo, cu awor bo partnernan ta bisa bo cu nan no ta reconoce e firma ey mas, pasobra ‘bo no ta gobierno legitimo’. Asina tin un sinfin di cos mas cu e gobierno di Maduro no por atende mas. Y pa no papia mes di e situacion di alimentacion y salud, cu no ta afecta hende pober so, sino gran parti di e sociedad, incluyendo e propio militarnan. Ta di spera cu e momento di gran violencia nunca yega.

Otro asunto cu a capta atencion tabata e areglo di disputa (geschillenregeling) cu atrobe a keda na mita caminda. Loke e islanan a logra haya ta un saco di mangel bashi, pasobra hiba amienda Hulanda pa bay trata den parlamento Hulandes, pa purba logra algo substancial, ta parce nos un ilusion. E punto cardinal di henter e asunto, e instancia hudicial independiente cu ta duna un veredicto imperativo, ta algo cu Hulanda lo no permiti hamas. Y e motibo pa cual cu nan no kier esey ta cu nan no kier haya nan mes maniobra den un skina pa un trio di ‘Lilliputter’ cu ta haya algo substancial di bisa den Reino.

Naturalmente nan lo no bay asina leu pa apoya un ley manera nos amigo Bosman di VVD kier introduci, unda di un manera habil ta duna e islanan un oportunidad di sali for di den Reino cu un mayoria simple den parlamento, y sin un consulta popular den forma di un referendum. E proyecto ey no ta logra.
Kico anto ta e perspectiva pa futuro? Cu nada dramatico ta bay sucede, en todo caso no cu e areglo di disputa manera e islanan kier. Ta pasa e ley, probablemente ignorando e amiendanan cu e islanan ta trece dilanti, y nos tin un bunita ley di Reino cu no ta loke tabata busca. Esaki ta un decepcion grandi? Pa e politiconan di e islanan si, pa nos como ciudadano hopi menos, ‘if ever’. Ban pone e cos aki simple manera e ta: ora tin conflicto, ta pasobra Reino mester interveni pasobra nos gobierno(nan) ta faya den duna nos bon gobernacion. Ta nan ta desea un extra arma pa bringa Hulanda, no e ciudadano comun y coriente. Y esey ta keda asina…