ORANJESTAD – Scouting ta un movemento educativo cu ta presenta rond di mundo, den cual 40 miyon di persona, hoben y adulto ta pertenece na mas di un miyon di grupo di scouting, nan ta comparti e mesun sistema di balornan y e deseo di construi un mundo miho.

Scouting ta kere cu educacion ta tur cos, y p’esey nan ta contribui cu e creacion di un mundo miho, mas husto, y solidario, ora e cuido di medio ambiente, respet pa e derechonan humano y entendimento entre persona y e pueblonan lo bira un realidad, como un movemento global.

Durante un entrevista cu Bon Di Aruba a haci cu sr. John Hessen, halto comisario di Scouting na Aruba, el a splica con importante e organisacion ta pa e muchanan. El a duna di conoce cu e lo ta den cargo di Halto Comisario te un par di luna mas, pa motibo cu despues di tres aña, hunto cu e directiva, a dicidi riba su retiro.

Hessen a bisa cu scouting ta ‘un organisacion mundial uniforma, cu ta educa hobennan pa nan bira un bon ciudadano’. El a splica cu na Latino America, e organisacion di scouting ta hopi grandi na Venezuela, Colombia, Brasil y otro.

Mundialmente scouting tin 44 miyon di miembro, y e mision pa 2023 ta pa nan tin 100 miyon di miembro. Cada pais tin e responsabilidad y obligacion di traha duro pa crece, tur pais cu ta afilia na ‘World Organisation Scout Move (WOSM)’ mester cumpli cu e parti ey.  Hessen a comenta cu Scouting Aruba a bira miembro di WOSM prome cu nan tabata miembro di region Interamericano como ‘Social Member’. Esey ta nifica cu e organisacion por bay na tur conferencia y tur actividad mundial, pero nan no tabatin voto, pa motibo cu nan tabata pertenece na e colonia di Hulanda. Despues nan a pidi pa WOSM e consideracion pa bira miembro, dia di 23 di april di aña 2000 nan a lanta e organisacion di Scouting Aruba, un organisacion crea bou e cuater organisacion cu tabatin prome. E organisacion mester tin un halto comisario, comisarionan assistent y directiva of comite nacional cu ta controla e trabou cu e ehecutivonan ta haci.

Hessen a expresa cu te awo esey ta bayendo bon, e organisacion aworaki tin entre 400 pa 500 miembro, di lo cual 100 di nan ta lider di 13 grupo dividi den Bevers, Cubs, Scouts, Explorers y Rovers. Tambe a splica cu scouting ta un organisacion cu mundialmente tin e meta di educa hobennan; mediante weganan e miembronan ta siña cierto normanan, balornan y caracternan. Cada ekipo tin tareanan specifico dependiendo di su edad. E miembronan mas chikito ta haci mas wega y esunnan mas grandi por cuminsa haci proyectonan social.

Hessen a bisa cu ‘bo tin cu sinti cu bo ta un parti di e comunidad aki, y bo tin cu aporta positivamente pa bo comunidad’. Tambe a expresa cu si e mayornan siña e muchanan di chikito cu nan tin como ciudadano un responsabilidad di aporta na nan comunidad, y pa nan sirbi pa e pais, cumpli cu Dios, y cumpli pa su mes, esey ta e lema di scouts.

“Si bo siña e muchanan e tres punto esencial, nan ta bira ciudadanonan ehemplar” Hessen a sigura.
Esey ta e importancia, segun Hessen, cu e scouts tin den un comunidad: forma ciudadanonan ehemplar.
Hessen a bisa cu nan tin hopi eventonan internacional, el a duna di conoce cu nan a caba di bin for di Panama, unda nan a atende e Interamerican Scouts Conference. Cada tres aña nan ta celebra conferencia regional, y tur aña e conferencia mundial pa halto comisario y ehecutivonan. Pa e miembronan tin e conferencia regional di Caribe, pa muchanan entre 6 y 12 aña di edad. E aña aki el a splica cu tin 40 mucha cu ta prepara pa bay Jamaica.

Hessel a splica cu boluntario ta nifica un persona cu kier participa pero no tin obligacion. Sinembargo, unabes cu un mucha ta aden y tuma encargo, e mester cumpli un bes pa siman.
Pa finalisa, el a sigura cu ta bon pa ‘hinca bo yiu den scouting, pa ta riba e bon caminda y pa e por keda riba e bon caminda’. E mayornan mester apoya e muchanan pa sigui den su carera y si ta posibel, e mucha cu e mayor aporta na scouting.