ORANJESTAD – Abogado Hans Sjiem Fat, kende ta representa director di Utilities Aruba N.V., Frans Hoevertz, no sa pa kico su cliente a wordo kita di e funcion aki. E ta kere cu esun cu mester tin contesta riba e pregunta aki ta e accionista principal di Utilities mes, cu ta gobierno; y hunta di comisario di e compania.
Aworaki e ta prefera di no duna mucho detaye riba e situacion aki. Den su opinion, e ta kere cu no tabatin hustificacion pa hala sr. Hoevertz for di su trabou. Tanten cu e situacion aki ta wordo defini, Hoevertz su contract di trabou ta sigui na vigor. E contract aki no a wordo termina ainda. Locual a wordo termina ta e relacion di Hoevertz como director di e compania menciona.
E abogado no a descarta cu algo asina lo por a pasa cu su cliente, sigur considerando nos custumber politico y algun otro retiro cu a yega di sosode den otro companianan estatal cu e cambio di gobierno ultimo.
Den un situacion asina, Sjiem Fat ta kere cu mester pensa riba pasonan legal si ta necesario. Sinembargo, ainda nan no a yega na e fase aki, ya cu ainda nan ta den un proceso di dialogo cu eventualmente lo por yega na un entendimento riba terminacion di e relacion laboral di Hoevertz di un forma mas amigabel. Te ainda no tin un proposicion concreto cu a wordo presenta riba mesa; pero den e proceso di dialogo cu e partinan envolvi ta hibando, lo por surgi algo den e proximo dianan, si nan por yega otro si of no.
Aunke su contract ta vigente, Hoevertz no ta den funcion mas como director di Utilities N.V. Pero logicamente e mester keda disponibel si mester di dje pa atende asuntonan di e compania mes, cu esun cu lo asumi su funcion no sa. Temporalmente hunta di comisario a punta Richard Eman pa representa e compania.
E retiro di Hoevertz for di su funcion no tabata un sorpresa. Generalmente, un reunion di accionista di e caliber aki semper ta wordo anuncia cu anticipacion, caminda un punto riba nan agenda tabatin di haber cu e retiro di Hoevertz como director di e compania aki.
