Ayera di tur manera tabata un dia di gloria pa Nicolas Maduro. Aunke henter mundo ta bisa cu no ta asina, e tin suficiente poder arma pa impone su opinion, ta pesey e ta un dictador. Di un banda ta bon cu gran parti di mundo ta reacciona rechasando su asuncion di poder, pero di otro banda por pensa tambe, cu tur e paisnan ey sa esaki di hopi tempo caba, y kico realmente a sucede den tur e tempo ey? Manera e presidente di Ecuador ta bisa, señala violacion di derecho humano ta un cuestion di etica, no di metemento den asunto interno di un otro pais. Y asina mes, despues cu e prome dianan di indignacion pasa, pa hopi di nan lo ta bolbe na ‘business as usual’? Realmente lo ta bay sucede algo cu lo trece un solucion pa e pueblo Venezolanomes mas cerca? O, manera nos a yega di vocifera caba na varios ocasion, ta parce cu ta sinta warda pa e regimen cay pa su propio peso, pero den tur esey nan a wanta hopi mas cu nos por a kere.

Y mientras tanto, e situacion ta birando critico. Ora ta constata cu 94% di e poblacion cu no a emigra no por alimenta nan mes adecuadamente, esey ta bisa tur cos. Y esey ta logico, ora cu un salario mensual di e mayoria no ta yega pa cuminda pa dos dia. No ta solamente e noticianan cu nos ta mira y lesa tur dia ta haci un impacto, sino tambe intercambio personal cu sa tin cu coleganan periodista cu ta trahando ainda den circunstancianan hopi dificil den e pais mes ta duna un imagen desesperante di e situacion. Sin embargo, e regimen ta sobrevivi tur cos te awor, y esnan cu algo di sentido comun no ta tribi mes di duna pronostica con largo e pesadiya aki ta bay dura ainda.

Mientras tanto, nos mester ta prepara pa posible consecuencia pa e posicion – corecto – cu Hulanda/Reino Hulandes a tuma contra e regimen di Maduro. Y como nos ta e isla mas cerca, e medidanan cu Maduro den su rabia den e dianan aki a anuncia contra esnan cu a tribi di critica su gobierno, por toca nos, atrobe. Ta parce en todo caso cu nos a yega na un momento cu nos mester reflexiona riba kico mas e situacion cerca e bisiña por bay trece pa nos.Aki nos por premira algun problema cu mester atende adecuadamente. Un ta un prohibicion atrobe di exportacion di producto alimentario, y problema pa biaha libremente pa Venezuela, y regresa.

Mientras cu den ultimo tempo e tensionnan di e prome lunanan di aña pasa a baha, nos por experimenta un situacion asina atrobe, unda no mester biaha pa e pais ey mes, si no ta necesario. Tin mas problema cu por surgi y esey ta provocacion riba lama y den aire pa crea un situacion di conflicto. Esey ta asunto pa Hulanda atende. Na e consulta di parlamentonan di Reino na St Maarten e siman aki a trata e tema aki di e situacion na Venezuela, sin cu e islanan cu mas ta afecta pa e entrada di refugiado/ilegal Venezolano, Aruba y Curaçao, realmente a avansa hayando mas comprension di e coleganan di e madre patria. Nos por rabia y critica nan pa esey, pero ta bon pa nos reflexiona bon ta con nos ta manehando e situacion aki. Basicamente e Hulandesnan ta keda para riba nan punto di bista cu nan no ta mira fluho di refugiado. Nan no ta mira ningun campamento di refugiado, unda e hendenan ta montona den poco tent, den condicion sanitario deplorable, y cu servicionan publico cu no por absorba tur e tareanan cu e estadia di e hendenan ey ta trece cu nan. Ta esaki ta e imagen cu nan tin nan dilanti, y nan no ta mira esey na e islanan. Por ta cu nan tin un tiki razon?

No ta asina cu e Venezolanonan no ta asina visible riba caya, manera un par di aña pasa, cu bo no por a bay saca placa na ATM, pasobra tabatin dies di nan para bo dilanti? Cu esey nos no kier bisa cu nos no tin un problema cu Venezolano, ilegal o refugiado, o cualkier otro denominacion, pero nos ta mira nan ta drumi riba caya, manera riba e imagennan cu nos ta mira tur dia den paisnan manera Colombia, Ecuador, Peru? Nos tin miles di ilegal den nos pais, pero esey tabata e caso pa e ultimo 25 aña caba, nada ta parce di a cambia. Logico anto cu e Hulandesnan ta insisti cu nos tin solamente un problema di ilegalidad, cu nos mes mester atende. Y cu de paso nunca nos a atende adecuadamente.

Talvez na e momento aki laga e discusion pa loke e ta, y enfoca mas riba otro discusion cu e Hulandesnan ta entama, y esey ta e trato cu mester duna na cada persona cu ta deteni pa deportacion, refugiado o ilegal, mescos tambe ta e caso di esnan deteni na prison. Nan ta metiendo den nos asuntonan interno cu esey? O, nan ta atende asunto legitimo di Reino?