America Latino: Varios reaccion riba huramentacion Nicolas Maduro

E huramento di Nicolas Maduro pa e proximo termino di seis aña como presidente di Venezuela a conduci na varios reaccion na otro paisnan riba continente. Presidente di Ecuador, Lenin Moreno, a dicidi di no manda representante di su gobierno na e ceremonia na Caracas, y ademas a ordena e retiro di su embahador na e pais ey.

Moreno a argumenta cu e señalamento di violacion di derecho humano como causa di e migracion Venezolano, a conduci na reaccion indebido di banda Venezolano, motibo pa Ecuador retira su embahador na Caracas. “Proteccion internacional di derecho humano ta un obligacion etico, no ta un intervencion den asunto interno, p’esey nos a dicidi di no manda delegacion pa e evento di 10 di januari.”
Moreno a declara cu solamente e Venezolanonan por resolve nan diferencianan manera otro pais democratico a haci esey. “Mi ta puntra mi mes, pakico esey no por sucede na Venezuela?”

OEA ta rechasa regimen Maduro
Organisacion di Estadonan Americano (OEA) a aproba ayera den un reunion extraordinario di su Conseho Permanente un resolucion cu ta declara e gobierno nobo di Nicolas Maduro ilegitimo, algun minuut despues cu e dictador a asumi un mandato nobo te 2025.

E texto a haya 19 voto na fabor, un mas di loke tabata necesario pa aprobacion. Mientras tanto, seis pais a vota contra, ocho a abstene y un no tabata presente.

E documento ta urgi e regimen di convoca eleccion nobo y ta invita e otro estadonan pa tuma medida di presion pa contribui na un pronto restauracion di e orden democratico. Mientras tanto, canciyeria di Peru a anuncia cu a yama nan encarga di asunto na e embahada Peruano na Caracas, Rosa Alvarez, pa consulta na Lima. Di banda di gobierno di Argentina, presidente Macri a declara encuanto Maduro, cu ‘su poder no ta autentico, aunke e ta trata di hunga e victima. Maduro ta presenta su mes como e presidente persigui. Pero e no ta e victima, Maduro ta e victimario’.

Gobierno di Chile a declara cu ‘Awe ta un dia scur den cual Nicolas Maduro ta bay pone un piedra riba tumba di democracia Venezolano, pero nos ta convenci cu e pueblo Venezolano lo lanta algun dia, pronto, nos ta desea, di e piedra ey pa democracia por bolbe reina’. Gobierno di Paraguay a anuncia cu ta kibra relacion diplomatico cu gobierno di Venezuela y ta cera su embahada na Caracas despues di e investidura di Maduro como presidente.