FRANKFURT, Alemania (AP) — E biento sacudiendo industria automotriz mundial a wordo sinti na Europa ayera, ora cu e fabricante di auto masal Ford, y e luhoso Jaguar Land Rover, a anuncia restructuracion amplio cu lo costa miles di cupo di trabou.
Ford Motor Co. a bisa cu e lo deshaci di un cantidad no specifica di cupo di trabou na Europa, mientras e ta purba di haci su negoshi mas consistentemente rendabel. Ford ta re- enfocando riba truck comercial y SUV, y stop modelonan menos lucrativo, mientras ta pasa pa produccion di autonan electrico a largo plaso.
E compania a bisa cu reduccion lo wordo logra, mas cu ta posibel, mediante retironan boluntario negocia cu e unionnan y representantenan di empleado. Ford di Europa, basa na Cologne, tin 53,000 persona trahando p’e directamente, y 68,000 ora ta inclui empresa conhunto manera esun na Rusia y Turkia.
E plan di e compania ta inclui ceramento di un planta di transmision automatico na Bordeaux, combinacion di sede administrativo na Reino Uni, y caba produccion di su modelonan C-Max na Saarlouis.
Fabricante di auto ta enfrentando retonan multiple. Nan mester ahusta na expectativa di cambio na mas uzo di bateria y vehiculonan autonomo, y na provee transporte como un servicio mediante app di comparti auto of pidi lift riba celular. Ademas, e fabricantenan ta enfrentando un cambio den preferencia di consumidor, bayendo di sedan y hatchback pa vehiculonan di utilidad deportivo. Mientras tanto, regulacion gubernamental na Union Europeo y China ta pushando nan pa desaroya mas auto electrico.
Fuera di esey, consumidonan y confiansa den negoshi a ricibi un golpi pa motibo di preocupacion tocante e posibel salida di Reino Uni for di Union Europeo sin un acuerdo di comercio, como tambe pa e disputa comercial entre China y Merca.
Un contratiempo fuerte – caida den benta na China – tabata un problema grandi pa Jaguar Land Rover. E compania a bisa cu e lo deshaci di 4,500 cupo di trabou, mientras e ta purba di maneha e caida Chines y e creciente incertidumbre tocante e terminonan di Brexit. E fabricante di auto di luho a bisa cu e retironan lo ta un adicion na e 1,500 persona cu a bandona e negoshi na 2018. E compania ta emplea como 44,000 persona na Reino Uni.
Segun Christian Stadler, profesor di maneho strategico na Warwick Business School, e retironan no ta mal noticia unicamente pa staf di Jaguar. Miles di trahadonan na Reino Uni ta parti di e cadena di abastecemento di Jaguar, trabounan cu awo tambe ta cay bou riesgo.
