(Infobae/AFP) – Un mucha muhe hoben Saudi, Rahaf Mohamed al Qunun, a sacudi e sociedad conservador na cual e ta pertenece, ora el a biaha di Kuwait pa Bangkok, unda el a declara cu e ta huy di e abuso psicologico y fisico di su famia. Un golpi fuerte pa mayoria, cu no ta custumbra cu ta critica e sistema di tutela tradicional cu hende homber ta mantene riba hende muhe.
E mucha muhe di apenas 18 aña a declara cu su obhetivo ta di busca refugio na Australia. Su pedido di ayudo a provoca e rabia di hopi di su compatriotanan, cu ta sigui kere den nan sistema di tutela. Pero tambe el a causa un intenso debate riba internet entre varios hoben di su pais, entre nan homber cu a declara cu mester caba cu e forma di tutela aki riba hende muhe.
Considera como un forma di ‘apartheid’ entre sexo, e sistema ta significa cu e muhenan Saudi ta depende di nan tutornan masculino (casa, tata, ruman of otro pariente cerca) ora ta trata di tuma decision manera studia, casa, biaha o incluso renoba paspoort.
Bandar, un hoben studiante di medicina, a lamenta den un video riba Twitter e hecho cu ‘e tutela ta duna hende homber un autoridad total riba hende muhe’. “Nan por controla nan, bofta nan, dal nan, haci loke nan kier sin cu ningun autoridad (publico) detene nan,” el a expresa. “Esey ta haci cu muhenan tin gana di bay biba afo, leu di e luga unda nan a nace of unda nan a lanta (…) pasobra biba aki ta hoga nan,” otro ta bisa. Ademas, den ultimo dianan un hashtag yama ‘Bandona e tutela, sino nos tur ta bay emigra’, a gana hopi interes riba internet. E pais ta pasando den hopi cambio rapido socio economico, pero no den tur sentido. Parti di e sociedad tin problema pa acepta cu hende muhe kier cambio.
