ORANJESTAD – Bon Dia Aruba a entrevista Tristan Vermeulen, kende ta encarga hunto cu team pa e trail run hoka one one Aruba walk & run 2019. Esaki lo bira e di dos aña cu ta organisa un careda asina.

E careda lo tuma luga dia 10 di februari, cada persona cu kier participa den e careda mester inscribi na Tri-Bike Aruba of cerca nan mes riba nan medionan social. E aña aki tin oportunidad pa muchanan tambe por participa.

Sinembargo, Vermeulen ta splica cu e careda di muchanan lo ta di 2 kilometer. “E race aki lo ta e prome race pa mucha, cuminsando di edad 8 bay ariba”, e ta splica. El a remarca tambe cu no mester tin experiencia, pero si mester bay cauteloso.

Den caso di adulto, Vermuelen ta agrega cu ta mescos cu mucha, no ta exigi experiencia, pero bay cu cuidou, mirando cu e careda lo ta den mondi. “Lo tin cuido medico si den caso cu tin situacion por bay malo, pero nos lo bay tin ayudo necesario y tambe di boluntarionan.”

Pa locual ta e careda pa adulto, esaki ta consisti den 6 kilometer y lo cuminsa for di 6:30 mainta. Adulto ta paga 25fl y muchanan ta paga 10fl. E ruta ta sali for di Cunucu 297 mes; di eynan tur e coredonan ta sali caminda pa ‘highway to hell’, despues di subi nan ta tuma e caminda pa bay direccion pabou. “Di eynan ta tuma un caminda cu yama wela, unda polis ta tira.”

Segun Vermeulen, mayoria di e careda lo tuma luga den mondi, lo tin algun parti cu lo ta den asfalt. “Esaki ta unico careda na Aruba cu ta un trail run. Nos ta gradici cu tur e socionan cu tin y cu ta yuda nos den cualkier cos, manera Total Services, Adidas, Local Store y mas. E fondonan lo ta pa yuda fundacion Berea.”

Sinembargo, Vermuelen ta bisa cu aña pasa a logra di haya maximo 100 participante. E ta bisa cu a bay ‘basta bon’. Pa e motibo aki, nan kier logra 500 hende pa por participa. “Aña anterior nos a haya feedback di hende awo pa haci e miho e aña aki.”

Apart di e careda tambe lo bay tin BBQ, unda hende por comparti y por come cu nan famia, amigonan y cu otro coredonan ‘e ta bay ta un happening’. Segun e ta bisa cu no solamente e lo ta un carera, pero un dia familiar cu lo tin varios actividad. “E por ta un evento grandi, bon vibes pa hende yega pa nan conoce rond, wak e cunucu, si nan wak algun berdura riba e cunucu cu nan lo kier purba, of conoce e matanan cu tin rond.”

E ta conseha pa hende bin pa asina tira un bista, nan lo por ricibi un rondleiding chikito. “Mi mes lo ta henter dia presente pa dirigi, y tambe por haya splicacion di e boluntarionan. E importante ta pa hende wak e cunucu, pa motibo cu nan sa di dje, pero nunca a wak of cana rond.”

Pa locual ta e fondonan pa fundacion Berea, e ta haya e ta bon causa, pa motibo cu e fundacion a yuda den diferente partinan di comunidad cu varios tema. Lo acerca fundacion Berea pa nan por comparti mas over di esey. “Berea kiermen un piedra riba otro, locual ta nifica un trabou riba otro pa crea algo bon.”