ORANJESTAD – Ta asina cu despues cu Marriott hotel a entabla un caso contra mediador di gobierno tocante un referendum solicita pa sindicato FTA pa e trahadonan di Ruth’s Chris Steak House, finalmente e hotel menciona a dicidi di hala e caso aki paden.

Departamento di mediador di gobierno a haya informacion cu diamars ultimo di parti di e abogado di e compania Marriott -unda e referendum mester tuma luga na Ruth’s Chris Steak House- cu nan a bay corte pa informa hues cu nan ta hala nan caso aden. Nan a considera cu e caso aki no ta necesario.
Segun mediador di gobierno, finalmente e hotel aki por a constata cu e maneho pa loke ta e no participacion den e referendum di trahadonan cu ta den nan periodo di prueba di 60 dia laboral, ta uno constante. Pues nan sa cu hues no lo bay opina di otro forma.

Sr. Pontilius a declara na Bon Dia Aruba cu e departamento aki a tuma un decision dia 21 di december caba cu debi cu e caso aki mester tuma luga mañan 11 di januari, cu e referendum pa e trahadonan di Marriott hotel na servicio di Ruth’s Chris Steak House ta wordo celebra dialuna dia 14 di januari di 10’or pa 11:30 di mainta na oficina mes di mediador di gobierno na Dr. Henriquezstraat 19.

“E ta un maneho hopi cla y conoci pa tur dunado di trabou. Pues e no ta nada nobo y consecuentemente aworaki e trahadonan ta bay emiti nan derecho di voto,” el a declara na e matutino aki. Un grupo di alrededor di 30 trahado ta na servicio di e restaurant menciona di cual mas of menos 24 di nan lo tin derecho di voto.

Antecedente
Ta asina e referendum di e trahado di Marriott hotel na servicio di Ruth’s Chris Steak House cu mester a tuma luga diahuebs 21 di december ultimo, pero el a keda posponi debi cu e compania Marriott Ruth’s Chris Steak House Restaurant caminda e referendum mester a tuma luga a pidi hues pa trata e caso aki. Nan tabata di opinion cu Mediador di Gobierno a exclui dos trahado cu ta traha den e restaurant menciona. Nan ta haya cu e trahadonan aki cu ta ariba nan 60 dia di prueba a wordo exclui for di nan lista di votadonan.

Na e ocasion ey, sr. Pontilius a yega di expresa na Bon Dia Aruba cu den e reunion cu nan a yega di sostene den e preparacion di e referendum, e compania a informa cu nan a tuma cuater trahado den servicio dia 4 y 5 di december. Na e momento ey, ya caba e referendum tabata den un proceso pa tuma luga. El a yega di splica cu e maneho ta cu e trahadonan den 60 dia di prueba no ta participa den niun referendum.

E maneho aki ta data for di decada di añanan 80; y e ta uno pa proteccion di e mesun trahadonan cu den e momento ey ta den periodo di prueba. Un periodo cu e trahado mes ta vulnerabel pa eventualmente perde su trabou pa nan afiliacion sindical.