ORANJESTAD – Bon Dia Aruba a pasa dilanti Departamento di Impuesto, unda rij largo cantidad di persona ta para pa busca nan plachi di number pa nan vehiculo di motor. Algun persona no tabata sa e regla, ki dia nan tin cu busca, of den cua rij nan tin cu para pa warda nan turno.
Un señora di edad a bisa cu ta inhumano cu tin un rij largo pafo den solo cu ta kima fuerte, anto no tin manera pa departamento mes pone un tent pa por tapa e personanan aki.
Despues di minuutnan largo cu ta para sin cu e rij tabata cana, un polis a sali y bisa cu e pensionadonan tin otro rij apart, pa asina e rij por cana dos caminda cu mas facilidad.
Esaki a pone cu e rij por a pasa, pero ainda asina e rij ta cana den su lentitud. Personanan ta keha cu no tin ningun aviso pa esunnan pensionado na cuminsamento. Esaki ta pone cu hende ta cuminsa agita, y esunnan grandi tambe, pa motibo cu tin solo fuerte y nada pa por proteha nan mes.
E rij cu no ta di pensionado a cuminsa cana mas lihe, pero e confusion a bolbe pa motibo cu tin par hende cu a paga online. Un señora a bisa cu el a paga online na e dianan comienso di luna ‘pa e proceso cana mas lihe’, pero ta remarca cu ainda cu a paga online e ta bayendo mas slow.
“Despues cu bo ta haci un rij largo pa bo drenta, nan ta bisa bo cu ta den e rij di pensionado, esunnan cu a paga online mester bay. No tin bon splicacion segun e comentario di e hendenan”, e señora a splica. E mes a bin busca pa otro persona
For di 9or, tin hende ainda ta wardando nan number di plachi despues di 1or di atardi, pa motibo cu ta dos caminda nan tin cu warda. “No gaña hende pa paga online cu e ta bay mas facil, sabiendo cu esunnan cu a paga online mester warda mas pa motibo cu nos no sa, pero kere cu printer no ta traha, of no tin papel pa print recibo, increibel”.
