ORANJESTAD – Parlamentarionan di Sint Maarten, Corsou y Aruba a reuni pa prepara topiconan di interes comun pa Reino Hulandes. E delegacionnan a conclui cu e ‘geschillenregeling’ cu gobierno Hulandes a entrega, no a tene cuenta cu e puntonan di salida cu e 4 parlamentonan di Reino a fiha.
Corte constitucional
E presidente di e corte constitucional na Sint Maarten a duna un presentacion amplio di nan tarea, y con e instituto aki por mitiga conflictonan den Reino. Interesante ta cu e comision Hulandes, cual mester conseha riba cambionan di e constelacion parlamentario, tambe a señala cu un corte constitucional ta beneficioso. Aworaki ta asina cu na Hulanda un hues no por dicta si un ley ta empugna cu constitucion Hulandes.
Geschillenregeling
Dos empleado publico Hulandes di e Ministerio di Asuntonan di Reino a duna e miembronan di parlamento di e paisnan Caribense un splicacion di e ‘geschillenregeling’. Sinembargo, nan no por a contesta dicon no a mantene na palabracionnan haci den pasado.
Pa conclui
E debatenan durante IPKO cu e delegacion Hulandes riba e topiconan menciona lo bira interesante. Aruba, Corsou y Sint Maarten ta di opinion cu e tres puntonan di salida, cual Hulanda tambe na mei 2018 ainda a ratifica den un carta dirigi na e secretario di Estado, mester wordo respeta. Ora tin conflicto den Reino entre dos pais, ta importante pa 1) un organo imparcial dicta riba esaki, 2) e ‘oordeel’ mester ta uno final (bindend), y mester trata conflictonan huridico. Ta interesante pa wak si e parlamento Hulandes tambe ta keda riba e mesun punto di salida cu nan a fiha te cu mei ultimo ainda.
