ORANJESTAD – 2019 lo ta un aña druk pa loke ta construccion y mehoracion di nos infrastructura di caretera. Un aña caminda e proyecto di Watty Vos Boulevard, na encargo di e compania Mota-Engil Aruba, lo ta den pleno ehecucion.
Nan lo cuminsa traha riba 8 rotonde nobo y un cu lo wordo reconstrui, cu ta esun na Santa Helenastraat. Nan tur lo tuma luga e aña aki, y aunke algun caminda lo keda cera simultaneamente, nan lo wak con nan lo planea cada un di nan pa obstaculisa e trafico lo menos posibel.
Durante nan prome conferencia di prensa di e aña nobo aki, tanto director di DOW, Marlon Croes como e project manager di e compania Mota-Engil Aruba, Joao Campos a duna un indicacion di e trabounan cu ta bay tuma luga den e proximo simannan, unda nan ta bay cera diferente caminda y unda nan trabou lo bira mas intensivo.
Den cuadro di e proyecto aki lo tin dos over-pass cu mester wordo traha, un na Hato y otro na Meiveld, na haltura di patras di ex edificio di Codemsa. Nan ta e dos caminda cu pronto lo bay cera, hunto cu esun na altura di Ling & Sons. E trabou lo inicia entrante diasabra dia 12 di januari. Nan lo tin desviacion debi na e construccionnan aki, ya cu nan ta bay cera e dos caminda. Esun prome, cu ta e caminda di Hato cu ta conecta Paradisewijk cu direccion di EPB y Aruba Aloe, lo wordo cera pa un periodo di 6 luna. E mesun tempo lo demanda esun di Meilveld.
Un trabou cu a wordo para y pospone durante temporada di fin di aña ta e crusada na altura di Ling & Sons pa bay Bushiri, y esaki lo cuminsa e aña aki tambe; e ta un periodo di construccion di tres luna. Tambe e crusada di Seroe Patrishi, cu lo bira un rotonde, lo sigui den transcurso di e proximo lunanan. Igualmente esun di Sun Plaza unda e luz di trafico ta. Otro lo ta esun di Juancho Irausquin Boulevard, na altura di Alhambra Casino, un crusada peligroso cu a yega di cobra bida di hende. Un rotonde mas lo ta na Eagle Beach na altura di Oceania. Un mas lo ta na Bubali Plas, net den e crusada pa nort di Amsterdam Manor, y lo tin e reconstruccion di e rotonde di Santa Helenastraat na altura di oficina di abogado Ecury and partner De Cuba-Wever.
E aña aki tambe lo traha riba e rotonde na Montaña, na haltura di e compleho deportivo Frans Figaroa. Y e ultimo rotonde lo ta net den e crusada di Rio Grande na Noord. Director di DOW a laga sa cu nan lo bin cu mas informacion na momento cu nan lo ta asina leu pa ehecuta e proyectonan aki durante henter aña 2019. Nan lo informa nos comunidad debidamente prome cu nan ta cera cierto caminda riba fecha specifico.
