ORANJESTAD – E instituto di investigacion TNO ta cera su portanan na Aruba. Prome minister, Evelyn Wever-Croes a declara cu gobierno di Aruba ta lamenta cu TNO ta cera e aña aki, ya cu su contract ta caba.

“Di un banda mi ta lamenta; pero di otro banda mi tin cu bisa si cu nos ta keda cu e lasonan cu TNO,” el a declara. E mandatario a declara cu e instituto renombra aki tin un contract cu gobierno di Aruba pa bastante miyones. Ademas, gobierno ta paga nan huur, pues e ta uno bastante extenso den gasto. Tur aña nan ta fiha un programa di proyectonan, cu nan ta haci di acuerdo cu e placa cu gobierno ta paga nan.

E gobierno actual (MEP-POR-RED) a informa TNO cu nan no por sigui cu e sistema aki. Aunke nan kier sigui traha cu nan den otro forma, ya cu nan ta un instituto tecnologico importante. Pero gobierno kier traha cu TNO a base di loke nan ta considera cu ta un necesidad. Esaki den cuadro di gobierno su plan economico pa desaroya seis sector, entre nan innovacion y economia di conocemento. Kiermen e no mester ta necesariamente loke TNO ta pone como e areanan cu nan por yuda cune.

E ta reconoce cu aña pasa TNO a hunga un rol hopi importante den e area di maneho di desperdicio, unda a wordo haci algun cambio riba e programa di e proyecto aki, pa asina mas placa por wordo aloca eynan. Otro caso cu a presenta tin di haber ora cu e proyecto di renobacion y expansion di hospital a presenta diferente problema, gobierno a pidi pa TNO haci un investigacion riba e calidad di e aire.

Pero e prijs cu nan a pidi tabata 175 mil dollar extra, aparte cu gobierno ta paga un suma pa nan presencia na Aruba. Mientras cu e mesun estudio aki a wordo haci pa 40 mil dollar pa otro instancia na Merca.

Pero debi cu e ta un contract a base di un programa di proyectonan fiho, gobierno no por haci uzo di nan experticio pa algo otro denter di e suma di 3.9 miyon florin cu gobierno ta paga na TNO. Segun premier Wever-Croes, nan ta prefera di bay na un areglo mas flexibel, a base di e necesidad di gobierno di Aruba, y nan lo sigui haci esaki. Asina como gobierno nan no ta keda mara na TNO so, sino cu nan por haci uzo di otro instancia internacional. Ya cu ora cu gobierno no tin e contract grandi aki mas, nan por keda mas liber y flexibel pa keda aplica nan propio programa y proyectonan.

A base di nan combersacion –segun e prome mandatario– TNO a informa gobierno cu den realidad ‘e modelo di Aruba no ta rentabel.’ Nan a purba pa medio di expande nan oferta tambe na otro pais, manera Colombia. Sinembargo, esaki no a duna e rentabilidad cu nan tabata kier.

E prome mandatario a afirma cu Aruba ta keda cu e laso cu TNO. Na momento cu nan kier haci un investigacion cu nan mester di e instituto aki, e portanan ta keda habri. No mas cu no tin un presencia di TNO na Aruba mas; pero e relacion aki ta sigui y e ta bay ta mas dirigi riba e necesidadnan cu Aruba tin.