ORANJESTAD – Recientemente e gobierno di Merca a anuncia cu nan tin un ‘Govermente Shut Down’ na Merca, pero esaki tambe ta afectando pasaheronan Arubiano cu ta biahando bek pa Aruba.
E “shutdown” aki tin di haber cu un muraya cu presidente di Merca Donald Trump kier construi pa mas o menos 5 biyon dollar, y cu e democratnan ta nenga di vota pro e muraya of sea pa e cantidad di placa cu Trump ta pidiendo.
Goverment shutdown
Goverment shutdown ta ora cu e gobierno no tin placa mas pa paga su trahadonan. Durante e periodo aki, e empleadonan ta sea traha sin haya un salario, of gobierno ta manda nan cas. Pa motibo di esaki hopi trahado ta bay A.O., cu a haya e nomber di ‘The Blue Flu’, y esaki ta pone cu actualmente tin filanan largo na aeropuertonan na Merca, of nan ta busca trabou unda si nan por haya un salario fin di luna mientras e shutdown ta vigente.
E situacion aki ta pone cu nan moral ta hopi abou, y aeropuertonan manera Miami, New York, Dallas, Seattle tin filanan largo, cu e consecuencia cu hopi pasahero ta perdiendo nan vuelonan y vuelonan di conexion. E grupo di trahado mas afecta ta e grupo di duana y siguridad di aeropuerto TSA, esaki ta locual ta causa un situacion di caos pa e fluho di pasaheronan incluyendo Aruba y Corsou.
