ORANJESTAD – Reciclahe ta un proceso ora e materia cu ta compone varios material cu nos ta uza dia pa dia manera papel, glass, aluminio, plastic, etc.; un bes cu nan ta caba su ciclo di bida, nan ta transforma den material nobo atrobe.

E produccion di sushi of residuo a duplica na ultimo 30 aña, e sociedad ta transformando e planeta den un cubo di sushi hopi grandi, un manera cu nan por haci pa reduci e cantidad di sushi y residuo ta e reciclahe.

Durante un entrevista cu Myenou Tromp, e ta un artesano local di Aruba, el a splica con e cuminsa cu e reciclahe y con ta traha cu material cu e hende ta tira den bari di sushi y despues e ta transforma den algo “extraordinario”.

Sra Tromp a bisa cu ora e tabata chikito e tabatin un pasion grandi pa tur lo cual ta naturalesa y medio ambiente, esey tabata un punto di interes p’e, haci tres aña pasa ora su yiu chikito a nace el a cuminsa traha mueble di palet recicla, na un prome instante el a bisa cu esey tabata pa uso personal, pero despues “par di cos a Sali asina bunita cu tabatin interes di otro hende cu tambe tabata kier e mesun producto ey”.

Tambe el a expresa cu esey tabata un manera cu lo cual e por pasa mas tempo cu su yiunan, e ta traha part-time y e trabou ey ta un entrada aparte, despues cu e tabata traha cu e palet y a haci stoelnan, mesa, shelf, cashi, pa companianan, restaurant y scolnan, el a ripara cu ta existi mas material cu por wordo reusa y recicla “ya cu e reciclahe no ta un custumber comun den e isla”.

Sra Myenou a comenta cu tin asina hopi diferente cos cu lo por haci cu e material cu nos a tira afo sin pensa dos biaha, for di eynan el a cuminsa recicla mas, desde un aña y mey el a cuminsa recicla mas material.

E material cu e ta usa mas ta tapa di cerbes, blekinan di refresco, tapa di plastic, tapa di biña, diferente cos cu el a haya pa diferente uso den su arte. El a splica cu despues cu e tabata traha e mueblenan, ta keda basta pida di palet y asina hopi cos cu lo wordo traha cu e, den final di dia nos mester hiba cos pa e dom y e ta bisa cu “eynan bo por wak e cantidad di cos cu tin eynan y nos tambe a ripara cu e reef ta un tiki mas pa riba di parkitiemboos e persona por wak hopi di e sushi cu ta cay den lama, e awa di eynan ta bruin, ta contamina y esey mi ta haya hopi tristo”. El a expresa cu na e momentonan aki e ta wak cu e dom ta full un sero y si esey ta sigui manera el a bisa “mi ta sinti cu si un hende no haci un esfuerso e ta bay sigui den e caminda ey”.

Di su parti sra Tromp a bisa cu awo cu e hende ta haci e accion di reciclahe por ehempel e compania Ecotech, tur hende tin e opcionnan cu por tuma bentaha dje y na final di dia tur e hende tin responsabilidad pa motibo cu e sushi ta di tur e personanan. El a comenta cu den su liñanan mas extenso e material pa traha ta e bleki di refresco y di cerbes, cu esey e ta traha renchi di horea, chokers, cadena, magnetic, entre otro. Tambe e ta bisa cu recientemente ta usa hopi tapa di plastic. Di e tema cu Aruba ta birando mas ecologico, Sra Tromp a expresa cu ta existi un par di instancia cu a tuma lo cual e ta yama “baby steps” manera el a bisa “ainda tin cos cu nos por haci, vooral cu nos ta un isla hopi chikito rondona pa lama y tambe nos ta un isla cu e turistanan ta bin depende pa wak nos bunita lama y esey tambe ta nos deber pa cuide”.

“No solamente ta tira un sushi di manera responsabel, pero tambe crea un economia mas circular pa nos tin un medio ambiente cu nos por ta mas orguyoso pa nos pasa pa nos yiunan”. Respecto loke ta e dom, el a agrega cu esey ta “necesary evil”, ,manera el a bisa “mi ta espera cu den transcurso di mi bida mi por wak mas cambionan cu lo por wordo haci y acepta door di e comunidad henter pa nos mester dje menos y menos”. “Mas nos ta bay recicla, reusa, nos ta bay reduci nos consumo di cosnan y menos nos ta bay tin e necesidad di usa e dom”. Sra Myenou a comenta.

Tambe a bisa cu e no ta comprende dicon ta existi conflicto cu un empresa cu ta haci cu e sushi ta bira gas, pa motibo cu ya Aruba tin e empresa ey, tin reciclahe plastic, manera el a bisa “ a mi mes a cuminsa cu mi mes esfuerso chikito di haci un aporte chikito, nos tin opcionnan, nos tin hende cu ta acepta y apoya e accionnan cu ta tuma ey”.

Pa finalisa sra Myenou Tromp a bisa “pa purba pensa pa dos biaha, ora bo tira algo den bari di sushi kico ta bay pasa cu e”. Pa motibo cu e bari di sushi no ta su destino final.