ORANJESTAD – Gobierno di Aruba no a wordo invita pa e instalacion di e presidente, Nicolas Maduro, pa un periodo mas na Venezuela. Igualmente prome minister di nos pais. Evelyn Wever-Croes a señala cu e tema di relacion exterior ta uno di reino Hulandes. Den esey pais Aruba no tin un espacio pa vocifera un opinion di Aruba mes.
El a bisa masha cla cu den e caso particular aki, reino Hulandes ta esun encarga cu e maneho di relacion exterior y den e caso aki, reino Hulandes ta dicidi ken ta bay represent’e. Aruba den todo caso no a wordo invita. Aunke tampoco pais Aruba ta wordo invita apart; pero tampoco nos pais a wordo invita pa representa reino como si a yega di sosode ora cu prome minister di Aruba a bay representa reino den e posesion ultimo di e presidente di Costa Rica.
Premier Wever-Croes a declara riba e situacion politico na Venezuela loke e sa ta cu reino Hulandes no ta reconoce e eleccion cu a tuma luga y tampoco ta reconoce e gobierno nobo na Venezuela. E posicion aki ta pone hopi tension den e relacion cu e pais bisiña aki. E no ta kere cu esaki lo tin su efecto riba e contract cu a wordo firma cu Citgo pa pone den operacion e refineria nacional na San Nicolas. Sinembargo e prome mandatario no por bisa nada cu exactitud debi cu e contract no ta cera cu e gobierno di Venezuela sino cu Citgo.
Citgo ta un compania Mericano afilia na PDVSA Holding cu si ta cay den man di gobierno di Venezuela. Pero e partinan den e contract mes cu a keda firma pa huur e refineria ta entre gobierno di Aruba y Citgo. E echo cu reino Hulandes no ta reconoce e gobierno di Venezuela e mandatario no ta weita cu tin un impacto directo. Pero si e ta complica e situacion un poco mas y e ta bira un topico cu na nivel di reino mester di mas aclaracion.
