Forsanan di siguridad Frances a tira gas lacrimogeno y ‘flash-ball’ contra un manifestacion, cu a cuminsa como marcha pacifico pero cu gradualmente a converti den violencia diasabra pasa na Paris.
E movimento di ‘jacket geel’ a convoca nan prome accion pa e aña nobo, den un intento pa mantene presion riba presidente Macron, cu a elimina e medidanan cu tabata concerni prijs di combustibel, pero e accionnan a amplia den direccion di un exigencia pa su renuncia como presidente.
Den e disturbionan di e fin di siman aki un boto restaurant cu tabata mara na oriya di riu Seine a pega candela . Huma y gas lacrimogeno tabata colga riba museo Orsay y e dak di oro di Academia Frances, mientras riot police, casi invisibel na inicio di e marcha, a cuminsa drenta den accion ora e marcha a desvia di e ruta acorda di antemano.
E marcha a logra penetra na avenida Champs-Elysees, e famoso boulevard cu tabata e centro di e marchanan anterior. E prome edificio gubernamental ataca tabata e oficina di e vocero di gobierno Frances, Benjamin Griveaux, cu a ser evacua di su oficina despues cu a destrui e porta dilanti.
E tabata e prome atake riba propiedad di estado desde cu e movimento di jacket geel a cuminsa cu nan accionnan ocho siman pasa. E activistanan a purba yega na e palacio presidencial Elysee, cu ta proteha manera un bunker.
E ultimo demostracion tabata manera un test pa e movimento mes, cu nan apoyo dunando señal di cansancio. Ministro di Interior Christophe Castaner a calcula cu alrededor di 50.000 persona a participa den accionnan na henter Francia diasabra. Polis na Paris a conta 3.500 participante.
