Scolnan na China awo por localisa tur nan studiantenan uzando uniformnan ‘smart’ ekipa cu un chip, pa curasha nan pa asisti, segun un reporte di e corant estatal The Global Times.
E implementacion ta mesun preocupante manera ‘uza tecnologia pa sa precies unda un studiante ta’ ta zona. Cada uniform tin dos chip den e schoudernan, cual ta wordo uza pa track unda y na ki momento e studiantenan ta drenta e scol, cu un dosis tambe di software di reconocemento di cara na entrada pa sigura cu e studiante corecto ta bisti e uniform corecto. Y si bo purba di bay durante orario di scol? Un alarma ta bati.
Segun un relato di The Verge, e uniformnan por wordo laba, maske nan tin e tecnologia ‘smart’ – segun e compania di tecnologia Guizhou Guanyu, cu a desaroya e uniformnan, cada un por wanta te 150 grado Celsius y por wordo laba 500 biaha. Ademas, tin caracteristicanan adicional, segun un reporte di The Epoch Times: e chipnan por detecta si un studiante a pega soño den klas, y ta permiti pa studiantenan por haci pago (haciendo uzo adicional di reconocemento di cara of fingerprint pa confirma e compra).
Segun The Verge, e uniformnan ta wordo uza na 10 scol na e provincia di Guizhou, y aparentemente tin algun rato caba den uzo – segun Lin Zongwu, director di e scol number 11 di Renhuai, mas di 800 studiante den e scol aki ta haciendo uzo di e uniformnan ‘smart’ desde 2016.
Y mientras e uniformnan tin como meta pa curasha studiantenan pa asisti na scol, ta parce cu no tin nada pa stop e administradonan di scol pa track e studiantenan pafo di scol, sikiera den e aspecto tecnologico, cual ta hopi preocupante. Sinembargo, segun Lin Zongwu, ‘nos ta scoge pa no check e ubicacion exacto di e studiantenan despues di scol’.
