Menos di 24 ora despues cu e Grupo Interdisciplinario di Experto Independiente (GIEI), liga na Organisacion di Estado Americano (OEA), a presenta un informe desastroso contra e regimen di Daniel Ortega, revelando cu a comete “crimen contra humanidad” durante e rebelion civico, polis nacional a ataca periodismo independiente cu e invasion den marduga di e oficina di e canal 100% Noticias y a aresta e director Miguel Mora diabierna pasa. Den e oficina e agentenan a destrui henter e interior. Diasabra Mora a ser presenta dilanti hues, acusa di conspira pa “comete acto terorista.”
Oficialmente Mora, cu den e ultimo lunanan tabatin problema constantemente cu autoridadnan y a ricibi varios menasa di morto di e regimen, a keda acusa di “provocacion, proposicion y conspiracion pa comete acto terorista.”
Pa ex-procurador general Alberto Novoa, esaki no tin, sin embargo, ningun base legal. “E detencion y awor acusacion di Mora no tin ningun base. E articulo 510, cu ta papia di incitacion di odio, ta hopi amplio y ta keda na interpretacion di fiscal. Mora no ta un incitador di odio. E ta haciendo un ehercicio di un profesion of oficio, un actividad di obtene informacion y transmiti informacion, e no ta inventando noticia. Si e noticianan ta parce negativo pa un sector, esey no ta califica pa acusa un persona di e delito di incitacion di odio,” segun Novoa.
Desde Estadonan Uni, otro cu a critica e dictadura tabata e director pa America di Human Rights Watch, Jose Miguel Vivanco, cu a califica e acusacion di “disparate” y a splica riba su cuenta di Twitter cu “ta trata di otro evidente atropeyo di e dictadura, di libertad di expresion.”
