ORANJESTAD- Ayera, tanto minister di enseñansa, ciencia y desaroyo sostenibel, Rudy Lampe, como su colega di finansa, asunto economico y cultura, Xiomara Ruiz-Maduro, tabata presente den sala di parlamento den reunion publico den cuadro di tratamento di presupuesto 2018.

E tabata un reunion cu a wordo posponi den oranan di merdia, debi cu dos parlamentario di e fraccionnan di coalicion, Ricardo Croes (RED) y Daphne Lejuez (MEP) no tabata presente. Kiermen di e 12 parlamentarionan cu ta forma e partidonan di coalicion di gobierno (MEP-POR-RED), a bira 10 debi na e ausencia di e dos parlamentarionan menciona. Despues di un discusion fuerte rond di legalisacion di cannabis diabierna ultimo, sr. Croes no a bolbe presenta na parlamento. Mientras informacion no oficial ta indica cu sra. Lejuez a dicidi di bay Hulanda pa un vakantie programa. Pues no tabatin e mayoria exigi di e mita plus 1 di parlamentarionan di coalicion pa por a sigui reuni, y menos aproba niun ley.

Preocupacion riba enseñansa

Un parlamentario cu a bay hopi critico riba maneho di minister di enseñansa tabata e miembro di e fraccion di MEP den coalicion di gobierno, Sue-Ann Ras. For di un prome momento, e parlamentario aki a cuestiona e hecho cu minister Lampe no ta atende nan preocupacion y preguntanan di un forma diligente riba tereno di enseñansa.

“Ta basta cu e wega di culpa otro, (y ta ora pa) para keto y analisa profundamente kico ta loke ta conduci na e resultado aki di enseñansa,” el a bisa. El a referi na e titularnan den prensa tocante e problematica den scolnan y e resultadonan no mucho bon ta relaciona cu e pronostico di varios rapport haci, cu ta mustra cu mester yuda mehora e rendimento escolar.

El a expresa cu mayoria di su pregunta formula ayera den parlamento tabata debi na su experiencia di un aña como parlamentario. Aunke el a yega di haci uzo di su herment como parlamentario pa haci preguntanan na e minister en cuestion, nan por tarda mas cu tres luna pa haya contesta, locual ta impedi cu e por sigui haci su funcion debidamente.

E biaha aki durante e tratamento di e presupuesto di enseñansa, sra. Ras tabata spera cu e por haya contesta na su preguntanan. Pero tambe cu e minister su contesta por convence su persona cu enseñansa tin prioridad den e maneho di gobierno.

Tambe e parlamentario a lamenta cu den un aña cu e ta forma parti di e comision fiho di enseñansa den parlamento, cinco reunion so tabatin. Mientras cu pa e aña parlamentario nobo aki cu a cuminsa for di september, no a tuma niun reunion mes. Tanten, tin hopi desaroyo den enseñansa, manera e por a ripara via e medionan di comunicacion.

E ta haya cu confiansa ta un balor cu bo no ta cumpra pa adkiri. Sino cu e ta tuma tempo pa medio di dialogo, comprension y actuacion pa logra esaki, segun sra. Ras. Te hasta el a expresa su preocupacion cu nos pais no yega na nivel di Grecia, unda un ambiente di desconfiansa ta existi entre e gremio di docente y gobierno. E dato aki el a referi riba un documento di Unesco, cu el a trece dilanti durante sra. Ras su oportunidad di haci pregunta durante e prome data di tratamento di presupuesto di enseñansa.

Maneho di idioma y presupuesto
Un aspecto cu e parlamentario aki a trece dilanti, como docente y papiamentista, tin di haber cu e maneho di idioma den enseñansa, cu no ta mucho conoci den comunidad. Mirando cu nan tabata tratando e aprobacion y maneho di presupuesto di enseñansa, el a pidi informacion di parti di minister riba implementacion di maneho nobo di idioma, mirando cu e minister mes a bisa cu esaki ta inter-ministerial.

Pero e por a compronde cu pais Aruba, pa medio di su planificacion nacional -pa loke ta trata SAN na cuminsamento di 2018- a prepara e directiva di scol riba e maneho di idioma nobo pa pais Aruba. El a indica cu maneho di idioma tin su influencia riba SAN; mientras cu el a tuma nota cu a baha e presupuesto pa loke ta trata e proyecto di innovacion den enseñansa cu 59% pa 2019. Mientras cu den e programa di gobernacion a wordo stipula cu lo wordo aloca fondonan disponibel pa implementacion di Papiamento banda di otro idiomanan den enseñansa.

Un pregunta cardinal di e parlamentario tabata ta con sr. Lampe lo haci esaki factibel, mirando cu a baha netamente e fondonan cu mester a wordo aloca. Y teniendo cuenta cu e aspecto financiero, ki plan realistico sr. Lampe tin pa e fase di preparacion di scol multilingual tuma luga y cumpli cu e meta di e fase aki, considerando cu e presupuesto dedica na esaki a baha considerablemente.

Na augustus, a drenta den e fase di preparacion pa loke ta trata e parti di implementacion di idioma nobo den scolnan. Sinembargo, e maneho nobo aki no ta conoci ainda pa nos maestronan y nos comunidad, tampoco e comision di enseñansa sa nada, segun sra. Ras. Mientras cu e ta considera esaki como e base principal di enseñansa, specialmente esun multilingual. Tambe el a puntra riba e fase dos pa introduccion di e maneho nobo di idioma, ya cu esaki no ta conoci ainda pa esun concerni.

Sra. Ras a vocifera su preocupacion riba maneho di enseñansa hunto cu otro miembronan di nos organo legislativo, ya cu e ta un di e factornan cu mas ta influi den e desaroyo y formacion di e persona y e sociedad. Pero tambe enseñansa ta enrikece cultura, balor y tur loke ta caracterisa nos como ser humano. El a destaca cu educacion ta importante pa atende cu e desigualdad social y economico; y amplia oportunidad pa nos hobennan.